ബാൾട്ടിമോർ, മേരിലാൻഡ് : ഹൃദയാരോഗ്യ മാസാചരണത്തോട് അനുബന്ധിച്ച് പ്രമുഖ മലയാളി അസോസിയേഷനായ കൈരളി ഓഫ് ബാൾട്ടിമോർ (KOB), ഇന്ത്യൻ അമേരിക്കൻ നഴ്‌സസ് അസോസിയേഷൻ ഓഫ് മേരിലാൻഡുമായി (IANAM) കൈകോർത്ത് ഹൃദയാരോഗ്യ ബോധവൽക്കരണ പരിപാടി സംഘടിപ്പിച്ചു. ഹൃദ്രോഗ പ്രതിരോധത്തെക്കുറിച്ചും ഹൃദയ സംബന്ധമായ ആരോഗ്യത്തെക്കുറിച്ചും സമൂഹത്തെ ബോധവത്കരിക്കാൻ ലക്ഷ്യമിട്ടുള്ള പരിപാടി ഓൺലൈനായാണ് സംഘടിപ്പിച്ചത്.
യൂണിവേഴ്സിറ്റി ഓഫ് മേരിലാൻഡ് ബാൾട്ടിമോർ വാഷിംഗ്ടൺ മെഡിക്കൽ സെൻ്ററിലെ കാർഡിയോളജി വിഭാഗത്തിൻ്റെ അസോസിയേറ്റ് ചെയർ, എഫ്എസിസി എംഡി ഡോ. അസ്ഗർ ഫഖ്രി മുഖ്യ പ്രഭാഷകനായി. അഡ്വാൻസ്ഡ് കാർഡിയാക് ഇമേജിംഗിലും ആർറിഥ്മിയ മാനേജ്മെൻ്റിലും സ്പെഷ്യലൈസേഷനുള്ള കാർഡിയോ വാസ്കുലർ ഹെൽത്തിലെ വിശിഷ്ട വിദഗ്ധനായ ഡോ. ഫഖ്രി, പ്രോക്റ്റീവ് ഹാർട്ട് കെയറിൻ്റെ പ്രാധാന്യത്തെക്കുറിച്ചും ഹൃദയ ചികിത്സയിലെ ഏറ്റവും പുതിയ മുന്നേറ്റങ്ങളെക്കുറിച്ചും പറഞ്ഞു. അദ്ദേഹം ഹൃദയാരോഗ്യത്തെക്കുറിച്ചുള്ള ചോദ്യങ്ങൾക്ക് മറുപടി നൽകുകയും ചെയ്തു.
IANAM പ്രസിഡൻ്റ് ഡോ. സൂര്യ ചാക്കോ
സ്വാഗതം പറഞ്ഞു, ബാൾട്ടിമോറിലെ കൈരളി പ്രസിഡൻ്റ് മൈജോ മൈക്കിൾസ് കമ്മ്യൂണിറ്റി അധിഷ്ഠിത ആരോഗ്യ വിദ്യാഭ്യാസ സംരംഭങ്ങളുടെ പ്രാധാന്യം എടുത്തുകാണിച്ചുകൊണ്ട് അധ്യക്ഷ പ്രസംഗം നടത്തി. യൂണിവേഴ്സിറ്റി ഓഫ് മേരിലാൻഡ് ബാൾട്ടിമോർ വാഷിംഗ്ടൺ ഹാർട്ട് അസോസിയേറ്റ്‌സിലെ കാർഡിയോളജി നഴ്‌സ് പ്രാക്ടീഷണറായ ഷീബ തട്ടിൽ, ഡിഎൻപി, സിആർഎൻപിയാണ് പരിപാടി നിയന്ത്രിച്ചത്.
നോർത്ത് ഈസ്റ്റ് ഒഹായോ മെഡിക്കൽ യൂണിവേഴ്സിറ്റിയിൽ നിന്ന് ബിരുദം നേടിയ ഡോ. ഫഖ്രി, ഹാർവാർഡ് മെഡിക്കൽ സ്കൂളിലെ ബെത്ത് ഇസ്രായേൽ ഡീക്കനെസ് മെഡിക്കൽ സെൻ്ററിൽ റെസിഡൻസി പൂർത്തിയാക്കി, ടെമ്പിൾ യൂണിവേഴ്സിറ്റിയിലെ അല്ലെഗനി ജനറൽ ഹോസ്പിറ്റലിൽ ഫെലോഷിപ്പ് നേടി. രോഗികളുടെ ശാക്തീകരണത്തോടുള്ള പ്രതിബദ്ധതയ്ക്ക് പേരുകേട്ട അദ്ദേഹം, ജീവിതശൈലി മാറ്റങ്ങൾ, ഹൃദയ സംബന്ധമായ പരിചരണത്തിലെ മെഡിക്കൽ പുരോഗതി എന്നിവയുടെ പ്രാധാന്യം അടിവരയിട്ടു. മെഡ്‌സ്റ്റാർ ഫ്രാങ്ക്ലിൻ സ്‌ക്വയർ ഹോസ്പിറ്റലിലെ നഴ്‌സ് പ്രാക്ടീഷണറായ അമ്പിളി ജോർജ്ജ്, ഡിഎൻപി, സിആർഎൻപി എന്നിവരുടെ നന്ദി പ്രകാശനത്തോടെ പരിപാടി സമാപിച്ചു.
