മിനാബ്: തെക്കൻ ഇറാനിലെ മിനാബ് നഗരത്തിലുള്ള പെൺകുട്ടികളുടെ പ്രൈമറി സ്കൂളിന് നേരെ നടന്ന മിസൈൽ ആക്രമണത്തിൽ കൊല്ലപ്പെട്ടവരുടെ എണ്ണം 153 ആയി ഉയർന്നതായി ഇറാൻ വിദ്യാഭ്യാസ മന്ത്രാലയം അറിയിച്ചു. ശനിയാഴ്ച രാവിലെ ആരംഭിച്ച അമേരിക്കൻ-ഇസ്രായേൽ സംയുക്ത സൈനിക നടപടിയായ ‘ഓപ്പറേഷൻ എപിക് ഫ്യൂറി’ ക്കിടെയാണ് അതിഭീകരമായ ഈ ദുരന്തമുണ്ടായത്. 95-ലധികം പേർക്ക് പരിക്കേറ്റതായും ഇവരിൽ പലരുടെയും നില അതീവ ഗുരുതരമാണെന്നും റിപ്പോർട്ടുകൾ സൂചിപ്പിക്കുന്നു.
മിനാബിലെ ‘ഷജറ തയ്യിബ’ സ്കൂളിന് നേരെ മൂന്ന് തവണ ബോംബാക്രമണം നടന്നതായി ഇറാൻ ആരോപിക്കുന്നു. ക്ലാസ് നടന്നുകൊണ്ടിരുന്ന സമയത്താണ് ആക്രമണമുണ്ടായത്.സ്കൂളിന്റെ സ്ഥാനം ഒരു ഇറാനിയൻ സൈനിക താവളത്തിന് വെറും 200 അടി മാത്രം അകലെയാണെന്ന് ഉപഗ്രഹ ദൃശ്യങ്ങൾ വ്യക്തമാക്കുന്നു. താവളം ലക്ഷ്യമിട്ടെത്തിയ മിസൈലുകൾ സ്കൂളിൽ പതിച്ചതാണോ അതോ മനപ്പൂർവ്വം ലക്ഷ്യം വെച്ചതാണോ എന്ന കാര്യത്തിൽ തർക്കം നിലനിൽക്കുന്നുണ്ട്.
ഇറാൻ വിദേശകാര്യ മന്ത്രി അബ്ബാസ് അരാഗ്ചി കൊല്ലപ്പെട്ട കുട്ടികളുടെ ചിത്രം പങ്കുവെച്ചുകൊണ്ട് ഇതൊരു “മനുഷ്യത്വരഹിതമായ യുദ്ധക്കുറ്റമാണ്” എന്ന് വിശേഷിപ്പിച്ചു. ഐക്യരാഷ്ട്രസഭ ഉടൻ ഇടപെടണമെന്നും അദ്ദേഹം ആവശ്യപ്പെട്ടു. ഈ സംഭവത്തെക്കുറിച്ച് അന്വേഷണം നടത്തുകയാണെന്ന് യുഎസ് സെൻട്രൽ കമാൻഡ് വക്താവ് ക്യാപ്റ്റൻ ടിം ഹോക്കിൻസ് പറഞ്ഞു. സിവിലിയന്മാരുടെ സംരക്ഷണത്തിനാണ് തങ്ങൾ മുൻഗണന നൽകുന്നതെന്നും അദ്ദേഹം കൂട്ടിച്ചേർത്തു.
ഇസ്രായേൽ പ്രതിരോധ സേനയും ഈ റിപ്പോർട്ടുകൾ പരിശോധിച്ചു വരികയാണെന്ന് അറിയിച്ചു. മിനാബിലെ ഈ സ്കൂൾ ആക്രമണം പശ്ചിമേഷ്യൻ യുദ്ധത്തിലെ ഏറ്റവും വലിയ സിവിലിയൻ ദുരന്തമായാണ് കണക്കാക്കപ്പെടുന്നത്. ഇറാനിലെങ്ങും അമേരിക്കയ്ക്കും ഇസ്രായേലിനുമെതിരെ വൻ പ്രതിഷേധ പ്രകടനങ്ങളാണ് നടക്കുന്നത്, തന്നെയുമല്ല ഒട്ടുമിക്ക ലോകരാജ്യങ്ങളും ശക്തമായി ഇതിനെ അപലപിച്ചിരിക്കുകയാണ്. ഈ ആക്രമണത്തിന് അതിശക്തമായ തിരിച്ചടി നൽകുമെന്ന് ഇറാന്റെ പുതിയ താൽക്കാലിക നേതൃസമിതി പ്രഖ്യാപിച്ചിട്ടുണ്ട്.
