ബാൾട്ടിമോർ, മേരിലാൻഡ്: പ്രമുഖ മലയാളി സംഘടനയായ കൈരളി ഓഫ് ബാൾട്ടിമോറിൻ്റെ (കെ.ഒ.ബി), ആദ്യ ഫാമിലി നൈറ്റ് കൊളംബിയയിലെ ദി മീറ്റിംഗ് ഹൗസിൽ സംഘടിപ്പിച്ചു. കൂട്ടായ്മയുടെയും സാംസ്കാരിക ആഘോഷങ്ങളുടെയും അടയാളമായ പരിപാടിക്ക് വലിയ സ്വീകാര്യതയാണ് ലഭിച്ചത്. ലഘുഭക്ഷണങ്ങളും വിഭവസമൃദ്ധമായ അത്താഴവും പരിപാടിയുടെ രുചിയേറ്റി.
കെ.ഒ.ബി പ്രസിഡന്റ് മൈജോ മൈക്കിൾസ് അദ്ധ്യക്ഷനായി. പരിപാടിയെയും കെ.ഒ.ബി സ്പോൺസർമാരെയും അഭിനന്ദിച്ച അദ്ദേഹം, മെയ് 2ന് നടക്കാനിരിക്കുന്ന ഷാൻ റഹ്മാൻ ഷോയെപ്പറ്റിയും സംസാരിച്ചു. ഏറെ പ്രതീക്ഷയോടെ കാത്തിരിക്കുന്ന സംഗീത സന്ധ്യയുടെ ടിക്കറ്റ് വിൽപ്പനയുടെ ഔദ്യോഗിക ലോഞ്ചിന്റെ പ്രഖ്യാപനവും പരിപാടിയിൽ നടന്നു. അംഗത്വ പുതുക്കലുകൾ ഉടനടി പൂർത്തിയാക്കാൻ എല്ലാവരെയും പ്രോത്സാഹിപ്പിച്ച മൈക്കിൾസ്, നടന്നുകൊണ്ടിരിക്കുന്ന KOB അംഗത്വ ഡ്രൈവിന്റെ ദ്രുതഗതിയിലുള്ള പുരോഗതിയെ പ്രശംസിച്ചു. 2025-ൽ വിവിധ പ്രവർത്തനങ്ങൾ സംഘടിപ്പിച്ച കെ.ഒ.ബി ടീമിനും കെ.ഒ.ബി അംഗങ്ങൾക്കും അദ്ദേഹം നന്ദി പറഞ്ഞു.
കെ.ഒ.ബി സെക്രട്ടറി റോഷിത പോൾ പുതുതായി ആരംഭിച്ച കെ.ഒ.ബി പ്രതിമാസ വീഡിയോ പരമ്പരയായ മഹർഷിയെ പ്രേക്ഷകർക്ക് പരിചയപ്പെടുത്തി. പ്രാദേശിക പ്രതിഭകളെയും സമകാലിക വിഷയങ്ങളെയും അഭിസംബോധന ചെയ്യുന്ന ആദ്യ എപ്പിസോഡ്, ഉയർന്ന വിനോദ മൂല്യം കൊണ്ട് സദസ്സിനെ ആകർഷിച്ചു.
പരിപാടിയിൽ യുവജന ഗ്രൂപ്പുകൾ ഉൾപ്പെടെയുള്ള പ്രാദേശിക കലാകാരന്മാർ നൃത്തം അവതരിപ്പിച്ചു. കുടുംബങ്ങൾക്കായി സംഘടിപ്പിച്ച കൈരളി ഗെയിംസ് ആവേശം കൂട്ടി. ബെറ്റ്സി കുഴിക്കാട്ടും ജെസീക്ക ജോണും സംഘടിപ്പിച്ച കെ.ഒ.ബി ക്വസ്റ്റ്, സൈജ ചിറയത്തും ഷൈനി അഗസ്റ്റിനും ചേർന്ന് സംഘടിപ്പിച്ച റിഡിൽസ്, ബെറ്റ്സിയും ജെസീക്കയും സംഘടിപ്പിച്ച ഗെയിം Guess What’s Behind Me ഉൾപ്പെടെയുള്ള ഗെയിമുകളിൽ സജീവ പങ്കാളിത്തവുമായി ടീമുകളും വ്യക്തികളും മുന്നോട്ടെത്തി.
പ്രേമം വാലന്റൈൻസ് ഡേ മത്സര വിജയികളെയും പരിപാടിയിൽ പ്രഖ്യാപിച്ചു. പ്രേമം പീപ്പിൾസ് ചോയ്‌സ് അവാർഡ് ലിജിയും തോമസ് വിതയത്തിലും നേടി. കെഒബി മീഡിയ പാർട്ണറായ ആഡംസ് ഇന്റർനാഷണൽ പ്രൊഡക്ഷനിൽ നിന്നുള്ള ലിജോ ചെറിയാൻ അവാർഡ് സമ്മാനിച്ചു. ടേസ്റ്റ് ഓഫ് ലവ് അവാർഡ് ദേവി ജോർജിനും ക്രിയേറ്റീവ് കിഡ്‌സ് കോർണർ അവാർഡ് ലിസ്ബത്ത് അപ്പക്കലിനും ലഭിച്ചു. ഇവന്റ് സ്പോൺസറായ അമേരിക്കൻ ബോർഡ് ഓഫ് ഇന്റേണൽ മെഡിസിൻ ആൻഡ് ജെറിയാട്രിക് മെഡിസിൻ ഡിപ്ലോമേറ്റ് ഡോ. ടോണി വർഗീസ് അവാർഡ് സമ്മാനിച്ചു. റീൽ റൊമാൻസ് അവാർഡ് ആഷ്നയും ബിസ്മിനും നേടി. ഡ്യുയറ്റ് സോങ്സ് ഓഫ് ലവ് അവാർഡ് ജെയിനും ആൽവിൻ ആലുവത്തിങ്കലും നേടി. മുൻ കെഒബി പ്രസിഡൻ്റും ലിബർട്ടി കൺസ്ട്രക്ഷൻസിന്റെയും വീ ലവ് സോളാർ പവർ എൽഎൽസിയുടെയും പ്രതിനിധിയുമായ ജിജോ ആലപ്പാട്ട് അവാർഡ് സമ്മാനിച്ചു.
പ്രേമം മത്സരത്തിൽ പങ്കെടുത്ത കുട്ടികളെ വേദിയിൽ നിമ്മി സുഭാഷ് ആദരിച്ചു, അവരുടെ സൃഷ്ടികൾ കെഒബി ഫേസ്ബുക്ക് പേജിലും ഇൻസ്റ്റാഗ്രാം പേജിലും പ്രദർശിപ്പിച്ചിട്ടുണ്ട്.
പ്രാദേശിക ഗായകരായ ജെയിൻ ആൽവിൻ, ലിജി തോമസ്, സ്റ്റെഫി റെജി, സാനി ജുബിൻ, നിമ്മി സുഭാഷ് എന്നിവരൊരുക്കിയ സംഗീതനിശ കാണികളെ ആനന്ദിപ്പിച്ചു. പരിപാടിയുടെ ഗ്രാൻഡ് സ്പോൺസറായ കൊളംബിയ സെന്റർ ഫോർ ഇംപ്ലാന്റ്സ് ആൻഡ് പീരിയഡോണ്ടിക്‌സിലെ ഡോ. സഞ്ജു ജോസ്, റാഫിൾ സമ്മാനമായി ആമസോൺ ഗിഫ്റ്റ് കാർഡ് പ്രഖ്യാപിച്ചു.
കെ.ഒ.ബി പ്രസിഡന്റ് മൈജോ മൈക്കിൾസ്, വൈസ് പ്രസിഡന്റ് ഓസ്റ്റിൻ ആലുവത്തിങ്കൽ, സെക്രട്ടറി റോഷിത പോൾ, ട്രഷറർ മരിയ തോമസ്, ജോയിന്റ് സെക്രട്ടറി ഡോ. സൂര്യ ചാക്കോ, ജോയിന്റ് ട്രഷറർ ബിജോ തോമസ്, സമർപ്പിത കമ്മിറ്റി അംഗങ്ങൾ എന്നിവരാണ് ഫാമിലി നൈറ്റിൻ്റെ മുഖ്യസംഘാടകർ. കെ.ഒ.ബി ട്രഷറർ മരിയ തോമസും മുൻ ട്രഷറർ ആശിഷ് തോമസും എംസിമാരായിരുന്നു.
കെ.ഒ.ബി വനിതാ ക്ലബ് ചെയർപേഴ്‌സൺ ഡോ. ദീപ മേനോൻ 2025 മാർച്ച് 8 ന് വരാനിരിക്കുന്ന അന്താരാഷ്ട്ര വനിതാ ദിനാഘോഷം പ്രഖ്യാപിച്ചു. ഷാജു തയ്യിൽ എഴുതി, നിർമ്മിച്ച ഗാനം അരങ്ങിലെത്തിക്കുകയും, അതിനെക്കുറിച്ചുള്ള ഉൾക്കാഴ്ചകൾ എല്ലാവരും പങ്കിടുകയും ചെയ്തു. ജനറേഷൻസ് ഓഫ് മിറക്കിൾസിന്റെ ആവേശകരമായ നൃത്ത പ്രകടനത്തോടെയാണ് പരിപാടി അവസാനിച്ചത്. തുടർന്ന് ഡി.എം.വി നാച്ച് നയിച്ച ഓപ്പൺ ഡാൻസ് ഫ്ലോറിൽ, അതിഥികൾ ഒത്തുചേർന്ന് നൃത്തം ചെയ്തു.
കലാ പ്രകടനങ്ങൾ, ഗെയിമുകൾ, സാമൂഹിക സാംസ്കാരിക ഇടപെടലുകൾ എന്നിവയെല്ലാം കൊണ്ട് കൈരളി ഓഫ് ബാൾട്ടിമോർ ഫാമിലി നൈറ്റ് മികച്ച വിജയമായിരുന്നു.
