വാഷിംഗ്ടൺ: യു.എസ് മിഡ്‌ടേം തിരഞ്ഞെടുപ്പിൽ ഡെമോക്രാറ്റിക് പാർട്ടി അട്ടിമറി വിജയം നേടി കോൺഗ്രസിന്റെ ഇരുസഭകളും പിടിച്ചെടുത്തെങ്കിലും, അമേരിക്കയിലെ ലക്ഷക്കണക്കിന് വരുന്ന വിദേശ തൊഴിലാളികളുടെയും അന്താരാഷ്ട്ര വിദ്യാർത്ഥികളുടെയും ആശങ്കകൾക്ക് പെട്ടെന്ന് പരിഹാരമുണ്ടാകില്ലെന്ന് റിപ്പോർട്ട്. ഹൗസ് ഓഫ് റെപ്രസെന്റേറ്റീവ്‌സിലും സെനറ്റിലും ഡെമോക്രാറ്റുകൾക്ക് ഭൂരിപക്ഷം ലഭിച്ചതോടെ ട്രംപ് ഭരണകൂടത്തിന്റെ കടുത്ത കുടിയേറ്റ നയങ്ങൾ കൂടുതൽ സൂക്ഷ്മമായ പരിശോധനകൾക്ക് വിധേയമാകുമെങ്കിലും, എച്ച്-1ബി വിസ ജീവനക്കാർക്കും ഇന്ത്യൻ വിദ്യാർത്ഥികൾക്കും എച്ച്-4 പങ്കാളികൾക്കും ആശ്വാസകരമായ തീരുമാനങ്ങൾക്കായി ഇനിയും കാത്തിരിക്കേണ്ടി വരും.
100 അംഗങ്ങളുള്ള യു.എസ് സെനറ്റിൽ കുറഞ്ഞത് 54 സീറ്റുകൾ നേടിയാണ് ഡെമോക്രാറ്റുകൾ ഭൂരിപക്ഷം ഉറപ്പാക്കിയത്. ഹൗസ് ഓഫ് റെപ്രസെന്റേറ്റീവ്‌സിലും റിപ്പബ്ലിക്കൻമാരുടെ 141 സീറ്റുകൾക്കെതിരെ 231 സീറ്റുകൾ നേടി ഡെമോക്രാറ്റുകൾ മുന്നിലെത്തി. 2027 ജനുവരി 3-ന് അധികാരമേൽക്കുന്ന 120-ാമത് പുതിയ കോൺഗ്രസിൽ ഇരുസഭകളുടെയും നിയന്ത്രണം ഡെമോക്രാറ്റുകൾക്ക് ലഭിക്കുന്നത് പ്രസിഡന്റ് ഡോണൾഡ് ട്രംപിന്റെ നിലവിലെ ഭരണകാലത്ത് ഇതാദ്യമായാണ്.
കോൺഗ്രസിലെ ഭൂരിപക്ഷ മാറ്റം ട്രംപ് ഭരണകൂടത്തിന്റെ നയങ്ങളെ സ്വയമേവ റദ്ദാക്കാൻ ഡെമോക്രാറ്റുകൾക്ക് അധികാരം നൽകുന്നില്ല എന്നതാണ് പ്രധാന തടസ്സം. ഇമിഗ്രേഷൻ നിയമവിദഗ്ദ്ധരുടെ അഭിപ്രായത്തിൽ, കോൺഗ്രസ് നിയന്ത്രിക്കുന്നവർ മാറിയെങ്കിലും നയങ്ങൾ രൂപീകരിക്കാനുള്ള എക്സിക്യൂട്ടീവ് അധികാരം ഇപ്പോഴും പ്രസിഡന്റിന്റെ കൈകളിൽ തന്നെയാണ്.സെനറ്റിൽ വലിയ കുടിയേറ്റ നിയമ പരിഷ്കരണങ്ങൾ പാസാക്കണമെങ്കിൽ 60 വോട്ടുകളുടെ ഭൂരിപക്ഷം ആവശ്യമാണ്. അതിനാൽ തന്നെ ട്രംപ് ഭരണകൂടം തങ്ങളുടെ കുടിയേറ്റ അജണ്ടകളുമായി എക്സിക്യൂട്ടീവ് ഉത്തരവുകളിലൂടെയും ഏജൻസി ചട്ടങ്ങളിലൂടെയും മുന്നോട്ട് പോകാനാണ് സാധ്യത. അന്വേഷണങ്ങൾ നടത്താനും ചോദ്യങ്ങൾ ചോദിക്കാനും മാത്രമായിരിക്കും കോൺഗ്രസിന്റെ അധികാരം പരിമിതപ്പെടുക.
