പ്രമുഖ ബ്രസീലിയൻ ബോഡിബിൽഡറും ഫിറ്റനസ് രംഗത്തെ സംരംഭകനുമായ ഹോസെ മറ്റെയസ് കൊറെയ സിൽവ(28) അന്തരിച്ചു. കൂട്ടുകാർക്കൊപ്പം ജിമ്മിൽ വ്യായാമം ചെയ്യുന്നതിനിടെ ഹോസെ കുഴഞ്ഞുവീഴുകയായിരുന്നു. ഹൃദയാഘാതംമൂലമാണ് മരണമെന്നാണ് പുറത്തുവരുന്ന റിപ്പോർട്ടുകൾ.
ഈ രംഗത്ത് ഏറെ ആരാധകരുള്ള വ്യക്തിയായിരുന്നു ഹോസെ. സൗത്ത് അമേരിക്കൻ ചാമ്പ്യൻഷിപ്പിൽ ഉൾപ്പെടെ മത്സരിച്ചിട്ടുമുണ്ട്. അഭിഭാഷകനും ന്യുട്രീഷനിസ്റ്റും കൂടെയായിരുന്ന ഹോസെയുടെ വിയോഗത്തിൽ ഞെട്ടിയിരിക്കുകയാണ് കുടുംബവും ആരാധകരും.
മാസങ്ങൾക്കിടെ ബ്രസീലിലുണ്ടാകുന്ന രണ്ടാമത്തെ സംഭവമാണിത്. അതിശയിപ്പിക്കുന്നരീതിയിൽ വണ്ണംകുറച്ചതിനേത്തുടർന്ന് വാർത്തകളിൽ നിറഞ്ഞുനിന്നിരുന്ന ബോഡിബിൽഡർ മതിയുസ് പാവ്ലക് സെപ്റ്റംബറിൽ സമാനമായരീതിയിൽ മരിച്ചിരുന്നു. ഹൃദയാഘാതമായിരുന്നു മതിയുസിന്റെ മരണത്തിലേക്കും നയിച്ചത്.
