Tuesday, November 17, 2026
HomeNewsഐപിഎല്ലിൽ നിന്നും വിരമിച്ച് ഇന്ത്യൻ ക്രിക്കറ്റ് ഇതിഹാസം മഹേന്ദ്ര സിങ് ധോണി

ഐപിഎല്ലിൽ നിന്നും വിരമിച്ച് ഇന്ത്യൻ ക്രിക്കറ്റ് ഇതിഹാസം മഹേന്ദ്ര സിങ് ധോണി

ചെന്നൈ : നീണ്ട 18 വർഷത്തെ ഐപിഎൽ കരിയറിന് വിരാമമിട്ട് ഇന്ത്യൻ ക്രിക്കറ്റ് ഇതിഹാസം മഹേന്ദ്ര സിങ് ധോണി. ഇനി ചെന്നൈ സൂപ്പർ കിങ്സിന്റെ മഞ്ഞക്കുപ്പായത്തിൽ ധോണിയെ മൈതാനങ്ങളിൽ കാണാനാകില്ല. അടുത്ത ഐപിഎൽ സീസണിൽ ധോണി ചെന്നൈ സൂപ്പർ കിങ്സിന്റെ മെന്ററായി പ്രവർത്തിക്കുമെന്ന് ടീം മാനേജ്‌മെന്റ് സോഷ്യൽ മീഡിയയിലൂടെ ഔദ്യോഗികമായി അറിയിച്ചു. 2027 ഐപിഎൽ സീസണിൽ ചെന്നൈയുടെ പുതിയ പരിശീലകനായ സഹീർ ഖാനൊപ്പമാകും ധോണി പ്രവർത്തിക്കുക. ഐപിഎല്ലിൽ താരങ്ങളെ നിലനിർത്താനുള്ള അവസാന ദിവസം അവസാനിക്കാനിരിക്കെയാണ് ചെന്നൈയുടെ ഈ നിർണായക പ്രഖ്യാപനം. ധോണിക്കൊപ്പം അദ്ദേഹത്തിന്‍റെ എഴാം നമ്പർ ജെഴ്സിക്കും ടീം വിരമിക്കൽ പ്രഖ്യാപിച്ചിട്ടുണ്ട്.

2008 ഏപ്രിൽ 19-ന് കിങ്സ് ഇലവൻ പഞ്ചാബിനെതിരായ മത്സരത്തിലാണ് ധോണി ആദ്യമായി ചെന്നൈ ജേഴ്സിയിൽ അരങ്ങേറിയത്. 2010, 2011, 2018, 2021, 2023 വർഷങ്ങളിൽ ചെന്നൈയെ അഞ്ച് ഐപിഎൽ കിരീടങ്ങളിലേക്കും, 2010-ലും 2014-ലും ചാംപ്യൻസ് ലീഗ് കിരീടങ്ങളിലേക്കും നയിച്ച നായകനാണ് അദ്ദേഹം. 2022-ൽ ക്യാപ്റ്റൻ സ്ഥാനം ഒഴിഞ്ഞെങ്കിലും 2025-ൽ താൽക്കാലിക ക്യാപ്റ്റനായും ടീമിനെ നയിച്ചു. പരുക്കുമൂലം കഴിഞ്ഞ സീസണിൽ ഒരു മത്സരം പോലും കളിക്കാൻ അദ്ദേഹത്തിന് സാധിച്ചിരുന്നില്ല. 278 ഐപിഎൽ മത്സരങ്ങളിൽ നിന്നായി 38.30 ബാറ്റിങ് ശരാശരിയിൽ 24 അർധ സെഞ്ചുറികൾ ഉൾപ്പെടെ 5,439 റൺസും, 158 ക്യാച്ചുകളും 47 സ്റ്റമ്പിങ്ങുകളും സ്വന്തമാക്കിയാണ് ധോണി കളിക്കളത്തോട് വിടപറയുന്നത്.

ധോണിയില്ലാതെ സിഎസ്കെ ഇല്ലെന്നും, കഴിഞ്ഞ രണ്ട് പതിറ്റാണ്ടുകളായുള്ള തങ്ങളുടെ ശക്തമായ ബന്ധത്തിന് അടിസ്ഥാനം പരസ്പര വിശ്വാസമാണെന്നും ചെന്നൈ സൂപ്പർ കിങ്സ് ടീമുടമ കാശി വിശ്വനാഥൻ പ്രതികരിച്ചു. 2008-ൽ ധോണിയെ ടീമിലെത്തിക്കാൻ താൻ നിർബന്ധം പിടിച്ചത് ജീവിതത്തിലെ ഏറ്റവും മികച്ച തീരുമാനമായിരുന്നുവെന്ന് കാലം തെളിയിച്ചതായും, കളിക്കളത്തിലെ നേട്ടങ്ങൾക്കപ്പുറം മികച്ചൊരു വ്യക്തിത്വമാണ് അദ്ദേഹത്തിന്റേതെന്നും കാശി വിശ്വനാഥൻ പറഞ്ഞു. ധോണി എപ്പോഴും ടീമിന്റെ ഭാഗമായിരിക്കുമെന്നും ചെന്നൈ എക്കാലവും അദ്ദേഹത്തിന്റെ വീടായിരിക്കുമെന്നും അദ്ദേഹം കൂട്ടിച്ചേർത്തു.

RELATED ARTICLES

LEAVE A REPLY

Please enter your comment!
Please enter your name here

Most Popular

Recent Comments