വാഷിങ്ടൺ : വിദേശ വിദഗ്ധ തൊഴിലാളികളെ H-1B വിസ വഴി യുഎസിൽ നിയമിക്കുന്നതിനുള്ള ചെലവ് 2 ലക്ഷം ഡോളർ കടന്നേക്കുമെന്ന് റിപ്പോർട്ട്. ട്രംപ് ഭരണകൂടം നേരത്തെ പ്രഖ്യാപിച്ച 1 ലക്ഷം ഡോളർ ഫീസിന് പുറമേ പുതിയതായി നിർദേശിച്ച 1,03,265 ഡോളർ ഫീസും കൂടി ബാധകമായാൽ ആകെ ചെലവ് 2,03,265 ഡോളറിലെത്തും.
എന്നാൽ നിലവിൽ ഈ തുക ഒരുമിച്ച് ഈടാക്കുന്നില്ല. 2025 സെപ്റ്റംബറിൽ പ്രസിഡന്റ് ഡൊണാൾഡ് ട്രംപ് ഒപ്പുവച്ച പ്രസിഡൻഷ്യൽ ഉത്തരവിലൂടെയാണ് ചില H-1B അപേക്ഷകർക്ക് 1 ലക്ഷം ഡോളർ ഫീസ് ഏർപ്പെടുത്തിയത്. വിദേശത്തുനിന്ന് യുഎസിലേക്ക് എത്തുന്ന ചില H-1B തൊഴിലാളികൾക്കായിരുന്നു ഇത് ബാധകം.എന്നാൽ 2026 ജൂണിൽ ഫെഡറൽ കോടതി ഈ ഫീസ് നിയമവിരുദ്ധമാണെന്ന് വിധിച്ച് തടഞ്ഞു. ട്രംപ് ഭരണകൂടം ഇതിനെതിരെ അപ്പീൽ നൽകിയിട്ടുണ്ട്. അതിനാൽ 1 ലക്ഷം ഡോളർ ഫീസ് നിലവിൽ ഈടാക്കുന്നില്ല. ഇതിനിടെ, ഹോംലാൻഡ് സെക്യൂരിറ്റി വകുപ്പ് (DHS) 1,03,265 ഡോളറിന്റെ പുതിയ ഫീസ് ഏർപ്പെടുത്താനുള്ള നിർദേശം മുന്നോട്ടുവച്ചിട്ടുണ്ട്. ഓഗസ്റ്റ് 24ന് ഫെഡറൽ രജിസ്റ്ററിൽ പ്രസിദ്ധീകരിച്ച നിർദേശം ക്വോട്ടയ്ക്ക് വിധേയമായ H-1B അപേക്ഷകൾക്ക് ബാധകമാകും.
ഉയർന്ന വിദ്യാഭ്യാസ യോഗ്യതയുള്ളവർക്ക് ലഭിക്കുന്ന ഇളവിന് അർഹമായ അപേക്ഷകളും ഇതിൽ ഉൾപ്പെടും. എന്നാൽ ക്വോട്ടയിൽ നിന്ന് ഒഴിവാക്കിയ H-1B അപേക്ഷകൾക്ക് പുതിയ ഫീസ് ബാധകമാകില്ല. നേരത്തെയുള്ള 1 ലക്ഷം ഡോളർ ഫീസ് വീണ്ടും പ്രാബല്യത്തിൽ വരികയും പുതിയ 1,03,265 ഡോളർ ഫീസ് നിയമമായി മാറുകയും ചെയ്താൽ രണ്ട് ഫീസും തൊഴിലുടമകൾ നൽകേണ്ടിവരുമെന്നാണ് DHS വ്യക്തമാക്കുന്നത്. അങ്ങനെ വന്നാൽ 1 ലക്ഷം ഡോളറും 1,03,265 ഡോളറും ചേർന്ന് 2,03,265 ഡോളർ നൽകേണ്ടിവരും. ഇതിന് പുറമേ സാധാരണ H-1B അപേക്ഷാ ഫീസും മറ്റ് ബാധകമായ ഫീസുകളും വേറെയുണ്ടാകും.
H-1B സംവിധാനം നടത്തുന്നതിനുള്ള വിവിധ ഫെഡറൽ ഏജൻസികളുടെ ചെലവ് കണ്ടെത്തുകയാണ് പുതിയ ഫീസിന്റെ ലക്ഷ്യമെന്ന് DHS അറിയിച്ചു. പുതിയ ഫീസിലൂടെ വർഷം കോടിക്കണക്കിന് ഡോളർ സമാഹരിക്കാനാകുമെന്നാണ് വകുപ്പിന്റെ കണക്ക്. പ്രതിവർഷം ഏകദേശം 85,000 ക്വോട്ടാ പരിധിയിലുള്ള H-1B അപേക്ഷകൾക്ക് ഇത് ബാധകമാകുമെന്നാണ് പ്രതീക്ഷ.
അതേസമയം, നേരത്തെയുള്ള 1 ലക്ഷം ഡോളർ ഫീസ് പ്രാബല്യത്തിലുണ്ടായിരുന്ന ആദ്യ അഞ്ച് മാസത്തിനിടെ 85 അപേക്ഷകർ മാത്രമാണ് ഫീസ് അടച്ചതെന്ന് USA Today റിപ്പോർട്ട് ചെയ്തു. അപേക്ഷകരുടെ എണ്ണം 87 ശതമാനം കുറഞ്ഞതോടെ ആ കാലയളവിൽ ഏകദേശം 2.8 കോടി ഡോളറിന്റെ വരുമാന നഷ്ടം ഉണ്ടായതായും റിപ്പോർട്ടിൽ പറയുന്നു.
നിലവിൽ 2,03,265 ഡോളറിന്റെ സംയുക്ത H-1B ഫീസ് നിലവിലില്ല. പഴയ 1 ലക്ഷം ഡോളർ ഫീസ് കോടതി തടഞ്ഞിരിക്കുകയാണ്. പുതിയ 1,03,265 ഡോളർ ഫീസ് ഇപ്പോഴും നിർദേശ ഘട്ടത്തിലാണ്.
