ജാവലിൻ ത്രോയിൽ രണ്ടുതവണ ഒളിമ്പിക്സ് മെഡൽ നേടി ഇന്ത്യയുടെ അഭിമാനതാരമായ നീരജ് ചോപ്ര വിവാഹിതനായി. സാമൂഹികമാധ്യമങ്ങളിലൂടെ ചോപ്ര തന്നെയാണ് ഇക്കാര്യം അറിയിച്ചത്. വിവാഹത്തിന്റെ ചിത്രങ്ങളും അദ്ദേഹം പോസ്റ്റുചെയ്തിട്ടുണ്ട്. ഹിമാനിയാണ് 27-കാരനായ നീരജ് ചോപ്രയുടെ ജീവിതപങ്കാളി.
‘ജീവിതത്തിന്റെ പുതിയൊരധ്യായം എന്റെ കുടുംബത്തോടൊപ്പം ആരംഭിച്ചു. ഞങ്ങളെ ഈ നിമിഷത്തിലേക്ക് കൊണ്ടുവന്ന് ഒന്നിപ്പിച്ച എല്ലാവരുടേയും അനുഗ്രഹങ്ങൾക്ക് നന്ദി. ഏറെ സന്തോഷത്തോടെ നീരജ്, ഹിമാനി.’ -ഇതാണ് ചിത്രങ്ങൾക്കൊപ്പം നീരജ് ചോപ്ര കുറിച്ചത്.
കല്യാണത്തെ കുറിച്ചുള്ള വിവരങ്ങൾ നീരജ് ചോപ്ര അതീവ രഹസ്യമാക്കിവെച്ചിരിക്കുകയായിരുന്നു. ഇൻസ്റ്റഗ്രാമും ഫെയ്സ്ബുക്കും എക്സും ഉൾപ്പെടെയുള്ള സാമൂഹികമാധ്യമങ്ങളിൽ അദ്ദേഹം തന്നെ വിവരം പങ്കുവെച്ചപ്പോഴാണ് ലോകം ഇക്കാര്യം അറിയുന്നത്. ആരാധകർക്ക് വലിയ സർപ്രൈസാണ് നീരജിന്റെ വിവാഹവാർത്ത.
