ന്യൂഡല്‍ഹി: റഷ്യയുടെ മുന്‍കൂര്‍ മുന്നറിയിപ്പ് റഡാര്‍ സംവിധാനം വൊറോനെഷ് സ്വന്തമാക്കാന്‍ ഇന്ത്യ തയയ്യാറെടുക്കുന്നതായി റിപ്പോര്‍ട്ട്. പ്രതിരോധ മേഖല കൂടുതല്‍ ശക്തിപ്പെടുത്തുകയെന്ന ലക്ഷ്യമാണ് ഇതിനുപിന്നില്‍.റഷ്യയുടെ റഡാര്‍ സംവിധാനം സ്വന്തമാക്കാന്‍ 4 ബില്യണ്‍ ഡോളറാണ് ഇന്ത്യ ചെലവിടുന്നതെന്ന് വിവിധ ദേശീയ മാധ്യമങ്ങള്‍ റിപ്പോര്‍ട്ട് ചെയ്യുന്നു.
ഭീഷണി കണ്ടെത്തല്‍ വര്‍ദ്ധിപ്പിക്കുന്നതിന് വിപുലമായ വൊറോനെജ് റഡാര്‍ മിസൈല്‍ സംവിധാനങ്ങളിലും റഡാര്‍ സാങ്കേതികവിദ്യയിലും പ്രാവീണ്യം നേടിയ റഷ്യയിലെ അല്‍മാസ്-ആന്റേ കോര്‍പ്പറേഷന്‍ വികസിപ്പിച്ചെടുത്ത വോറോനെഷ് റഡാര്‍ സംവിധാനമാണ് നിര്‍ദിഷ്ട കരാറിന്റെ കേന്ദ്രഭാഗം.
8,000 കിലോമീറ്ററിലധികം ലംബമായ പരിധിയും 6,000 കിലോമീറ്ററിലധികം തിരശ്ചീനമായ ദൂരവും ഉള്ള റഡാറിന് ബാലിസ്റ്റിക് മിസൈലുകള്‍, സ്റ്റെല്‍ത്ത് എയര്‍ക്രാഫ്റ്റുകള്‍, യുദ്ധവിമാനങ്ങള്‍, ഭൂഖണ്ഡാന്തര ബാലിസ്റ്റിക് മിസൈലുകള്‍ എന്നിവയുള്‍പ്പെടെ ഒന്നിലധികം ഭീഷണികള്‍ കണ്ടെത്താനും ട്രാക്കുചെയ്യാനും കഴിയും. റഷ്യന്‍ അവകാശവാദമനുസരിച്ച്, സിസ്റ്റത്തിന് ഒരേസമയം 500-ലധികം വസ്തുക്കളെ നിരീക്ഷിക്കാനും ബഹിരാകാശത്ത് ഭൂമിക്ക് സമീപമുള്ള വസ്തുക്കളെ ട്രാക്ക് ചെയ്യാനും കഴിയും.
ചൈന, ദക്ഷിണേഷ്യ, ഇന്ത്യന്‍ മഹാസമുദ്രം എന്നിവയുള്‍പ്പെടെയുള്ള നിര്‍ണായക പ്രദേശങ്ങളില്‍ സാഹചര്യങ്ങളെ കൃത്യമായി മനസിലാക്കാന്‍ ഈ സംവിധാനം വഴിയൊരുക്കും.് പ്രാദേശികവും ആഗോളവുമായ വെല്ലുവിളികള്‍ക്കിടയില്‍ ഇന്ത്യയുടെ സുരക്ഷാ ആവശ്യങ്ങള്‍ പരിഹരിക്കുന്നതാകും ഈ സംവിധാനം.
