കുവൈത്ത് സിറ്റി : എച്ച്ഐവി സ്ഥിരീകരിച്ച നൂറിലധികം വിദേശികളെ കുവൈത്ത് തിരിച്ചയച്ചു. വാർഷിക എയ്ഡ്സ് ആൻഡ് വെനീറിയൽ ഡിസീസസ് കോൺഫറൻസിലാണ് ഇക്കാര്യം അറിയിച്ചത്. എയ്ഡ്സിനെതിരെ കുവൈത്ത് ഫലപ്രദമായ നടപടികൾ സ്വീകരിച്ചുവരികയാണ്.
എച്ച്ഐവി ബാധിതരായ 90% പേരെയും തിരിച്ചറിയുക, അവരുടെ അവസ്ഥയെക്കുറിച്ച് ബോധവാന്മാരാക്കുക, 90% പേർക്കും ഫലപ്രദമായ ചികിത്സ നൽകുക തുടങ്ങി യുഎൻ എയ്ഡ്സിന്റെ 90-90-90 ലക്ഷ്യങ്ങൾ കുവൈത്ത് നേടിയതായും ചൂണ്ടിക്കാട്ടി. ദേശീയ എയ്ഡ്സ് സ്ട്രാറ്റജി 2023-2027ന്റെ ഭാഗമായി 2025 ഓടെ 95-95-95 ലക്ഷ്യം നേടാനുള്ള ശ്രമത്തിലാണ് രാജ്യം. ഇതിന്റെ ഭാഗമായി സർക്കാർ ആശുപത്രികളിൽ പരിശോധനയും കൗൺസിലിങും നൽകുന്നുണ്ട്.
