തിരുവനന്തപുരം: കെ.എസ്.യു പ്രതിപക്ഷ ലൈനിലോ സർക്കാരിനെതിരായ തുറന്ന പോരിലല്ലെന്നും ഇത് തങ്ങളുടെകൂടി സർക്കാരാണെന്നും കെ.എസ്.യു സംസ്ഥാന പ്രസിഡന്റ് അലോഷ്യസ് സേവ്യർ. കഴിഞ്ഞ 10 വർഷം തങ്ങൾകൂടി സമരം ചെയ്തും ചോരയൊഴുക്കിയും അധികാരത്തിലെത്തിച്ച സർക്കാറാണിത്. സമൂഹമാധ്യമത്തിലെ മുഖമില്ലാത്ത പ്രൊഫൈലുകൾ എഴുതിവിടുന്ന ക്യാപ്സ്യൂളുകൾ കോൺഗ്രസിന്റേതല്ല. അതല്ല കോൺഗ്രസിന്റെ പാരമ്പര്യം. ഇക്കാര്യങ്ങൾ അറിയാതെ ചില കോൺഗ്രസുകാർ പെട്ടുപോയിട്ടുണ്ട്. അവരെ കുറ്റം പറയുന്നില്ല. പ്ലീഡർ നിയമന വിഷയത്തിന്റെ മെരിറ്റിലല്ല, കോൺഗ്രസിന്റെ ആഭ്യന്തര രാഷ്ട്രീയവുമായി ബന്ധപ്പെടുത്തിയാണ് സമൂഹമാധ്യമങ്ങളിൽ ചർച്ചകളുണ്ടായത്. സർക്കാരിനെ ദുർബലപ്പെടുത്തുന്ന പ്രചാരണങ്ങൾ അടിസ്ഥാനമില്ലാത്ത ആക്ഷേപങ്ങളാണ്.
മുഖ്യമന്ത്രിയുമായി സൗഹൃദസംഭാഷണങ്ങളും സംവാദങ്ങളും ഉണ്ടായിട്ടുണ്ടാകാം. അതൊന്നും മാധ്യമങ്ങൾക്ക് മുന്നിൽ പറയാനാവില്ല. തങ്ങളെക്കൂടി വിശ്വാസത്തിലെടുത്ത് പോകുന്ന സർക്കാറാണിതെന്ന് പൂർണ ബോധ്യമുണ്ട്. പ്ലീഡർ നിയമനവുമായി ബന്ധപ്പെട്ട് സംഘടനയുടെ നിലപാട് പാർട്ടിയെയും സർക്കാറിനെയും അറിയിച്ചു. വിഷയത്തിൽ സർക്കാരും പാർട്ടിയും പോസിറ്റീവായി ഇടപെടുമെന്നാണ് പ്രതീക്ഷ. സർക്കാർ തീരുമാനങ്ങളെ പ്രവചിക്കാനാവില്ലല്ലോ. മുഖ്യമന്ത്രിയുമായുള്ള കൂടിക്കാഴ്ചയിൽ തൃപ്തനാണോ എന്ന ചോദ്യത്തിന് എന്താണ് തൃപ്തിക്കുറവുണ്ടാകേണ്ട കാര്യം എന്നായിരുന്നു പ്രതികരണം.
