വാഷിംഗ്ടൺ : ഫെബ്രുവരിയിൽ ആരംഭിച്ച ഇറാൻ യുദ്ധം അമേരിക്കൻ ജനതയുടെ കുടുംബ ബഡ്ജറ്റുകളെ തകിടം മറിക്കുന്നതായി റിപ്പോർട്ട്. യുദ്ധത്തെത്തുടർന്നുണ്ടായ ആഗോള വിലക്കയറ്റവും പണപ്പെരുപ്പവും കാരണം ഓരോ അമേരിക്കൻ കുടുംബത്തിനും ശരാശരി 1,000 ഡോളറിൻ്റെ (ഏകദേശം 83,000 രൂപ) അധികച്ചെലവ് ഉണ്ടായതായി പ്രമുഖ റേറ്റിംഗ് ഏജൻസിയായ മൂഡീസ് അനലിറ്റിക്സിലെ ചീഫ് ഇക്കണോമിസ്റ്റ് മാർക്ക് സാൻഡി വ്യക്തമാക്കുന്നു.
മേയ് മാസത്തിലെ പണപ്പെരുപ്പ നിരക്ക് കഴിഞ്ഞ മൂന്ന് വർഷത്തെ ഏറ്റവും ഉയർന്ന നിലയിലെത്തിയെന്ന സർക്കാർ കണക്കുകൾക്ക് പിന്നാലെയാണ് ഈ ഞെട്ടിക്കുന്ന വിശകലനം പുറത്തുവന്നിരിക്കുന്നത്. യു.എസും ഇറാനും തമ്മിൽ ഇതുവരെ ശാശ്വതമായ സമാധാന കരാറിലെത്താത്തതും, താല്കാലിക വെടിനിർത്തൽ ലംഘിച്ച് കഴിഞ്ഞ ദിവസങ്ങളിൽ ഇരുരാജ്യങ്ങളും തമ്മിൽ നടത്തിയ വ്യോമാക്രമണങ്ങളും പ്രതിസന്ധി രൂക്ഷമാക്കുന്നു.
യുദ്ധം കാരണം അമേരിക്കക്കാർക്ക് ഉണ്ടായ ഏറ്റവും വലിയ ചെലവ് പെട്രോൾ വിലവർദ്ധനവാണ്. മേയ് മാസത്തിൽ റെക്കോർഡ് നിരക്കിലെത്തിയ പെട്രോൾ വില കാരണം യുദ്ധം തുടങ്ങിയതിനു ശേഷം മാത്രം ഒരു സാധാരണക്കാരന് ഇന്ധനത്തിനായി 300 ഡോളറോളം അധികം ചെലവഴിക്കേണ്ടി വന്നു.ഡീസൽ വില വർദ്ധിച്ചതോടെ ഫാമുകളിൽ നിന്നും ഫാക്ടറികളിൽ നിന്നുമുള്ള ചരക്കുനീക്കത്തിൻ്റെ ചെലവ് കുത്തനെ കൂടി. ഇത് വിപണിയിൽ നിത്യോപയോഗ സാധനങ്ങളുടെ വിലക്കയറ്റത്തിന് കാരണമായി. ഇന്ധനവില വർദ്ധനവ് കാരണം മാത്രം ഒരു സാധാരണ അമേരിക്കൻ കുടുംബത്തിന് പലചരക്ക് സാധനങ്ങൾക്കായി 200 ഡോളറിലധികം അധികമായി ചെലവിടേണ്ടി വന്നിട്ടുണ്ട്.
പലിശനിരക്കുകളും വിമാനക്കൂലിയും വർദ്ധിച്ചു
സാധാരണക്കാർക്ക് പലിശനിരക്കിലുണ്ടായ വർദ്ധനവ് വഴി 150 ഡോളറിൻ്റെ ബാധ്യതയുണ്ടായി. പണപ്പെരുപ്പം നിയന്ത്രിക്കാൻ കേന്ദ്ര ബാങ്കായ ഫെഡറൽ റിസർവിന് പലിശനിരക്കുകൾ ഉയർത്തേണ്ടി വന്നത് ഉപഭോക്താക്കൾക്കും ബിസിനസുകൾക്കും വൻ തിരിച്ചടിയായി. വിമാന ഇന്ധനത്തിൻ്റെ വില വർദ്ധിച്ചതോടെ ടിക്കറ്റ് നിരക്കുകൾ കൂടിയതും യാത്രക്കാർക്ക് 100 ഡോളറോളം അധികച്ചെലവ് വരുത്തിവെച്ചു.
പ്രതിദിനം സൈന്യത്തിനായി 50 മില്യൺ ഡോളർ
ഇറാനെതിരെയുള്ള സൈനിക നീക്കങ്ങൾക്കായി അമേരിക്കൻ സർക്കാർ പ്രതിദിനം 50 മില്യൺ ഡോളറിലധികം അധികമായി ചെലവഴിക്കുന്നുണ്ടെന്നാണ് റിപ്പോർട്ട്. ഇത് ജനങ്ങളുടെ നികുതിപ്പണത്തിൽ നിന്നാണ് ഈടാക്കുന്നത്. യുദ്ധത്തിൻ്റെ ആകെ ചെലവ് ഇതിനോടകം തന്നെ 50 ബില്യൺ ഡോളർ കടന്നതായി യു.എസ് ഉദ്യോഗസ്ഥർ സമ്മതിക്കുന്നു.“ഓരോ കുടുംബത്തിനും 1,000 ഡോളർ നഷ്ടമുണ്ടായി എന്ന കണക്ക് വളരെ കുറഞ്ഞ ഒന്നാണ്. യഥാർത്ഥ നഷ്ടം ഇതിലും എത്രയോ കൂടുതലായിരിക്കും,” മാർക്ക് സാൻഡി മുന്നറിയിപ്പ് നൽകുന്നു. ബ്രൗൺ യൂണിവേഴ്സിറ്റിയിലെ ഗവേഷകരുടെ കണക്കനുസരിച്ച് ഇന്ധനത്തിന് മാത്രം ഉപഭോക്താക്കൾക്ക് ആകെ 64 ബില്യൺ ഡോളറിൻ്റെ അധികബാധ്യത വന്നിട്ടുണ്ട്.
കഴിഞ്ഞ ജൂണിൽ നടന്ന പ്രമുഖ സർവേ ഏജൻസിയായ ഗാലപ്പിൻ്റെ വോട്ടെടുപ്പ് പ്രകാരം, മൂന്നിൽ രണ്ട് അമേരിക്കക്കാരും സമീപകാലത്തുണ്ടായ ഈ വിലക്കയറ്റം കാരണം കടുത്ത സാമ്പത്തിക പ്രതിസന്ധി നേരിടുന്നതായി സാക്ഷ്യപ്പെടുത്തുന്നു. യുദ്ധം അവസാനിപ്പിക്കാനുള്ള സമാധാന ചർച്ചകൾ ഖത്തറിൽ തുടരുമെന്ന് പ്രസിഡൻ്റ് ട്രംപ് അറിയിച്ചിട്ടുണ്ടെങ്കിലും, അതിൽ ഉണ്ടാകുന്ന പുരോഗതിയെ ആശ്രയിച്ചിരിക്കും വരുംദിവസങ്ങളിലെ വിപണിയിലെ മാറ്റങ്ങൾ.
