അമേരിക്കയും ഇറാനും തമ്മിലുള്ള സംഘർഷാവസ്ഥയ്ക്ക് അയവു വരുത്തിക്കൊണ്ട് രണ്ടാം ഘട്ട ചർച്ചകൾക്ക് കളമൊരുങ്ങി. ആണവ കരാറുമായി ബന്ധപ്പെട്ട തർക്കങ്ങൾ പരിഹരിക്കുന്നതിനായി ഇറാൻ വിദേശകാര്യ മന്ത്രി ജനീവയിലേക്ക് പുറപ്പെട്ടു. ഒമാന്റെ മധ്യസ്ഥതയിലായിരിക്കും ഈ നിർണ്ണായക ചർച്ചകൾ നടക്കുക. തങ്ങൾക്കെതിരെയുള്ള സാമ്പത്തിക ഉപരോധങ്ങൾ നീക്കം ചെയ്യുകയാണെങ്കിൽ ആണവ വിഷയത്തിൽ വിട്ടുവീഴ്ചകൾക്കും പുതിയ ധാരണകൾക്കും തയ്യാറാണെന്ന് ഇറാൻ വിദേശകാര്യ സഹമന്ത്രി കഴിഞ്ഞ ദിവസം വ്യക്തമാക്കിയിരുന്നു. ഇറാന്റെ ഈ നിർദ്ദേശത്തോട് അമേരിക്ക അനുകൂലമായാണ് പ്രതികരിച്ചത്.
ഇറാന്റെ സന്നദ്ധതയോട് ഏറ്റവും പോസിറ്റീവായ പ്രതികരണമാണ് വാഷിംഗ്ടണിൽ നിന്നുണ്ടായത്. നയതന്ത്ര തലത്തിലുള്ള ചർച്ചകളിലൂടെ പ്രശ്നപരിഹാരത്തിനാണ് അമേരിക്ക മുൻഗണന നൽകുന്നതെന്ന് സ്റ്റേറ്റ് സെക്രട്ടറി മാർക്കോ റൂബിയ അറിയിച്ചു. ഇതിന് പിന്നാലെ അമേരിക്കൻ മിഡിൽ ഈസ്റ്റ് പ്രതിനിധി സ്റ്റീവ് വിറ്റ്കോഫ്, ജെറാഡ് കുഷ്നർ എന്നിവരുടെ നേതൃത്വത്തിൽ ഉന്നതതല ചർച്ചകൾ നടന്നിരുന്നു. ഈ നീക്കങ്ങൾക്കൊടുവിലാണ് ജനീവയിൽ രണ്ടാം ഘട്ട ചർച്ചകൾ നടത്താൻ ഇരുവിഭാഗവും തീരുമാനത്തിലെത്തിയത്.
ലോകം ഉറ്റുനോക്കുന്ന ഈ ചർച്ചകൾ പശ്ചിമേഷ്യയിലെ സമാധാന ശ്രമങ്ങൾക്ക് പുതിയ പ്രതീക്ഷ നൽകുന്നതാണ്. ആണവ പദ്ധതികളുടെ സുതാര്യത ഉറപ്പാക്കുന്നതിനൊപ്പം ഇറാന്റെ സാമ്പത്തിക താൽപ്പര്യങ്ങൾ സംരക്ഷിക്കപ്പെടുന്ന തരത്തിലുള്ള ഒരു കരാറാണ് ചർച്ചയുടെ പ്രധാന അജണ്ട. വർഷങ്ങളായി തുടരുന്ന ശത്രുത അവസാനിപ്പിക്കാനുള്ള ഈ നീക്കത്തിന് ഒമാന്റെ ഇടപെടൽ വലിയ കരുത്താകുന്നുണ്ട്. ജനീവയിലെ ചർച്ചകളുടെ ഫലം വരും ദിവസങ്ങളിൽ അന്താരാഷ്ട്ര രാഷ്ട്രീയത്തിൽ നിർണ്ണായക മാറ്റങ്ങൾ ഉണ്ടാക്കിയേക്കും.
