വാഷിംഗ്ടൺ: ഹാർവാർഡ് കോളേജിൽ ഗ്രേഡ് ഇൻഫ്ലേഷൻ അതിഗുരുതരമായി വർധിക്കുന്നതായി റിപ്പോർട്ട്. ഇപ്പോൾ അവിടെ നൽകുന്ന ഗ്രേഡുകളിൽ പകുതിയിൽ കൂടുതലും ‘എ’ ഗ്രേഡുകളാണ്. വർഷങ്ങളായി സ്കൂൾ അധികൃതർ ഈ പ്രവണതയെക്കുറിച്ച് മുന്നറിയിപ്പ് നൽകിയിട്ടുണ്ടെങ്കിലും ഗ്രേഡ് ഇൻഫ്ലേഷൻ വർധിക്കുകയാണെന്നാണ് പുതിയ കണക്കുകൾ വ്യക്തമാക്കുന്നത്.
ഹാർവാർഡിന്റെ ഓഫീസ് ഓഫ് അണ്ടർഗ്രാജ്വേറ്റ് എജ്യുക്കേഷൻ പുറത്തുവിട്ട റിപ്പോർട്ട് അനുസരിച്ച്, യൂണിവേഴ്സിറ്റിയുടെ ബിരുദ പ്രോഗ്രാമുകളിലെ ക്ലാസുകളിൽ നൽകുന്ന ഗ്രേഡുകളിൽ ഏകദേശം 60 ശതമാനം ‘എ’ ഗ്രേഡുകളാണ്.ഇത് ഒരു ദശാബ്ദം മുൻപ് 40 ശതമാനം മാത്രമായിരുന്നു. 20 വർഷം മുൻപ് ഇത് കാൽഭാഗത്തിൽ (25%) താഴെയായിരുന്നുവെന്നും റിപ്പോർട്ടിൽ പറയുന്നു.
നേരത്തെ ഗ്രേഡ് ഇൻഫ്ലേഷൻ നിയന്ത്രിക്കാൻ ശ്രമിച്ച മറ്റ് ഐവി ലീഗ് സ്കൂളുകൾ ഉൾപ്പെടെയുള്ള പ്രമുഖ സർവകലാശാലകളിലും സമാനമായ പ്രശ്നങ്ങൾ നിലവിലുണ്ട്. ഹാർവാർഡ് ബിരുദ ഡീനായ അമാൻഡ ക്ലേബോ ആണ് റിപ്പോർട്ട് തയ്യാറാക്കിയത്. വിദ്യാർത്ഥികളുടെ ഭൂരിഭാഗം പേർക്കും ഉയർന്ന സ്കോറുകൾ നൽകുന്ന രീതി അവസാനിപ്പിക്കാൻ അവർ അധ്യാപകരോട് ആവശ്യപ്പെട്ടു. ഈ രീതി അക്കാദമിക സംസ്കാരത്തെ ദുർബലപ്പെടുത്തുന്നുണ്ടെന്നും അവർ മുന്നറിയിപ്പ് നൽകി.
“നിലവിലെ സമ്പ്രദായങ്ങൾ ഗ്രേഡിംഗിന്റെ പ്രധാന ധർമ്മങ്ങൾ നിറവേറ്റുന്നതിൽ പരാജയപ്പെടുക മാത്രമല്ല, കോളേജിന്റെ അക്കാദമിക സംസ്കാരത്തെ കൂടുതൽ ദോഷകരമായി ബാധിക്കുകയും ചെയ്യുന്നു,” ഡീൻ ക്ലേബോ റിപ്പോർട്ടിൽ വ്യക്തമാക്കി. ട്രംപ് ഭരണകൂടം രാജ്യത്തെ ഉന്നത വിദ്യാഭ്യാസ മേഖലയിൽ മാറ്റങ്ങൾ കൊണ്ടുവരാൻ ശ്രമിക്കുന്നതിനിടയിലാണ് ഈ റിപ്പോർട്ട് പുറത്തുവന്നത്. വിദ്യാർത്ഥികളെ വിലയിരുത്തുന്നതിന് “ഗ്രേഡ് സമഗ്രത”, “ന്യായീകരിക്കാവുന്ന നിലവാരം” എന്നിവ ഉറപ്പാക്കാനുള്ള ഉടമ്പടിയിൽ ഒപ്പിടാൻ ഫെഡറൽ അധികൃതർ സർവകലാശാലകളോട് ആവശ്യപ്പെട്ടിട്ടുണ്ട്.
