വാഷിങ്ടൺ: വൈറ്റ് ഹൗസിന്റെ കിഴക്കേ ഭാഗം പൂർണമായും തകർത്ത്, പുതിയ നൃത്തശാല പണിയുന്നതിനുള്ള പദ്ധതിക്ക് ആരംഭം നൽകി. ജാക്വലിൻ കെന്നഡിയുടെ പേരിലുള്ള പൂന്തോട്ടം ഉൾപ്പെടെയുള്ള ഈ ഭാഗത്ത് ഇപ്പോൾ അവശിഷ്ടങ്ങൾ മാത്രമാണ് കാണപ്പെടുന്നത്. 30 കോടി ഡോളറിന്റെ (ഏകദേശം 2635 കോടി രൂപ) ഈ പദ്ധതിയിലൂടെ, വൈറ്റ് ഹൗസിന്റെ കിഴക്കേ ഭാഗത്ത് പുതിയ നൃത്തശാല പണിയുമെന്ന് യു.എസ്. പ്രസിഡന്റ് ഡൊണാൾഡ് ട്രംപ് പ്രഖ്യാപിച്ചിരുന്നു.
ഫ്രാങ്ക്ളിൻ ഡി റൂസ്വെൽറ്റ് കാലത്ത് (1933-45) പ്രസിദ്ധമായ ഈ കെട്ടിടം, പ്രഥമ വനിത എലീനർ റൂസ്വെൽറ്റ് അതിഥികളെ സ്വീകരിക്കാൻ ഉപയോഗിച്ചിരിന്നു. ഇതിന്റെ രണ്ടു നിലകളിലും ഔദ്യോഗിക ഇവന്റുകൾ, വിരുന്നുകൾ തുടങ്ങിയവ നടന്നിരുന്നു. ട്രംപ് കഴിഞ്ഞ ജൂലൈയിൽ പ്രഖ്യാപിച്ച 20 കോടിയുടെ പദ്ധതിയുടെ ചെലവ് പിന്നീട് 25 കോടിയിലേക്കും, കഴിഞ്ഞ വ്യാഴാഴ്ച 30 കോടിയിലേക്കും ഉയർത്തി.
എന്നാൽ, “നികുതിദായകർക്കു യാതൊരു ചെലവും ഇല്ലാതെ” താനും തന്റെ സുഹൃത്തുക്കളും ചേർന്ന് ഈ പദ്ധതിക്ക് ഫണ്ടുകൾ നൽകുമെന്ന് ട്രംപ് പറഞ്ഞു. വൈറ്റ് ഹൗസ് പ്രസ് സെക്രട്ടറി കരോലിൻ ലെവിറ്റ്, നിർമ്മാണത്തിൽ സംഭവിക്കുന്ന മാറ്റങ്ങൾ ചെലവിന്റെ ഉയർച്ചക്കും, പൊളിച്ചുനീക്കലിനും കാരണമാണ് എന്ന് വ്യക്തമാക്കി.
