ന്യൂഡല്‍ഹി: ബോയിംഗ് 787-8 വിമാനങ്ങളിലെ ഇന്ധന നിയന്ത്രണ സ്വിച്ചിന്റെ ലോക്കിംഗ് മെക്കാനിസത്തിന്റെ മുന്‍കരുതല്‍ പരിശോധനകള്‍ പൂര്‍ത്തിയാക്കിയതായി എയര്‍ ഇന്ത്യ. ഇന്ധന നിയന്ത്രണ സ്വിച്ചിന്റെ ലോക്കിംഗ് മെക്കാനിസത്തില്‍ പ്രശ്നങ്ങളൊന്നും കണ്ടെത്തിയിട്ടില്ല എന്ന് എയര്‍ ഇന്ത്യ അറിയിച്ചു. സിവില്‍ ഏവിയേഷന്‍ റെഗുലേറ്റര്‍, ഡയറക്ടറേറ്റ് ജനറല്‍ സിവില്‍ ഏവിയേഷന്‍ ജൂലൈ 21-നകം നിര്‍ദ്ദിഷ്ട ബോയിംഗ് വിമാന മോഡലുകളുടെ ഇന്ധന നിയന്ത്രണ സ്വിച്ചിന്റെ പരിശോധിക്കാന്‍ നിര്‍ദ്ദേശം നല്‍കിയിരുന്നു.
അഹമ്മദാബാദ് വിമാനാപകടത്തിന്റെ പശ്ചാത്തലത്തില്‍ ആയിരുന്നു ഇത്. ഡി ജി സി എ നിര്‍ദേശത്തെ തുടര്‍ന്നാണ് എയര്‍ ഇന്ത്യ പരിശോധനകള്‍ നടത്തിയത്. ‘ബോയിംഗ് അറ്റകുറ്റപ്പണി ഷെഡ്യൂള്‍ അനുസരിച്ച് ഞങ്ങളുടെ എല്ലാ ബോയിംഗ് 787-8 വിമാനങ്ങള്‍ക്കും ത്രോട്ടില്‍ കണ്‍ട്രോള്‍ മൊഡ്യൂള്‍ മാറ്റിസ്ഥാപിക്കല്‍ നടത്തിയിട്ടുണ്ട്. ഇന്ധന നിയന്ത്രണ സ്വിച്ച് ഈ മൊഡ്യൂളിന്റെ ഭാഗമാണ്,’ ഒരു എയര്‍ ഇന്ത്യ ഉദ്യോഗസ്ഥന്‍ പറഞ്ഞു.
പരിശോധനകള്‍ എല്ലാം പൂര്‍ത്തിയായി എന്നും ഒരു പ്രശ്നവും കണ്ടെത്തിയിട്ടില്ല എന്നും ഉദ്യോഗസ്ഥന്‍ പറഞ്ഞു. അഹമ്മദാബാദില്‍ ബോയിംഗ് 787-8 ഡ്രീംലൈനറിന്റെ അപകടത്തെക്കുറിച്ചുള്ള എയര്‍ ക്രാഫ്റ്റ് ആക്സിഡന്റ് ഇന്‍വെസ്റ്റിഗേഷന്‍ ബ്യൂറോ റിപ്പോര്‍ട്ട് പ്രകാരം, രണ്ട് എഞ്ചിനുകളുടെയും ഇന്ധന കട്ട്ഓഫ് സ്വിച്ചുകള്‍ ലിഫ്റ്റ് ഓഫിന് തൊട്ടുപിന്നാലെ കട്ട്ഓഫ് സ്ഥാനത്തേക്ക് മാറ്റിയതായിരുന്നു കണ്ടെത്തിയിരുന്നു.
എ എ ഐ ബി റിപ്പോര്‍ട്ടില്‍ പറഞ്ഞിരിക്കുന്ന കാലഗണന അനുസരിച്ച്, ടേക്ക് ഓഫ് ചെയ്ത ഉടന്‍ തന്നെ രണ്ട് ഇന്ധന കട്ട്ഓഫ് സ്വിച്ചുകളും ‘റണ്‍’ എന്നതില്‍ നിന്ന് ‘കട്ട്ഓഫ്’ എന്നതിലേക്ക് ഒരു സെക്കന്‍ഡ് വ്യത്യാസത്തില്‍ മാറി. രണ്ട് എഞ്ചിനുകളും ഏറ്റവും കുറഞ്ഞ നിഷ്‌ക്രിയ നിരക്കിന് താഴെയായതിനാല്‍ റാം എയര്‍ ടര്‍ബൈന്‍ (ആര്‍ എ ടി) പമ്പ് ഹൈഡ്രോളിക് പവര്‍ വിതരണം ചെയ്യാന്‍ വിന്യസിച്ചു.
വിമാനം പറന്നുയരുന്നതിനും തകര്‍ന്നുവീഴുന്നതിനും ഇടയിലുള്ള സമയം 32 സെക്കന്‍ഡ് ആയിരുന്നു. നേരത്തെ, എയര്‍ ഇന്ത്യ എക്‌സ്പ്രസിന്റെ ഏതാണ്ട് മുഴുവന്‍ ബോയിംഗ് 737 മാക്‌സ് ഫ്‌ലീറ്റും പരിശോധിച്ചിരുന്നു. ഒരു പ്രശ്നവും കണ്ടെത്തിയില്ല എന്ന് ഉദ്യോഗസ്ഥന്‍ കൂട്ടിച്ചേര്‍ത്തു. 2018 ഡിസംബറില്‍ പുറത്തിറക്കിയ യു എസ് ഫെഡറല്‍ ഏവിയേഷന്‍ അഡ്മിനിസ്‌ട്രേഷന്റെ ബുള്ളറ്റിന്‍ പാലിക്കാന്‍ ആണ് ഡി ജി സി എ നിര്‍ദ്ദേശം നിര്‍ബന്ധിതമാക്കിയത്.
