ദുബൈ: ബർദുബൈയെ ദുബൈ ഐലന്റുമായി ബന്ധിപ്പിക്കുന്ന നാലു വരിപ്പാലത്തിന് പച്ചക്കൊടി കാട്ടി ദുബൈ റോഡ് ഗതാഗത അതോറിറ്റി. 78.6 കോടി ദിർഹം ചെലവു വരുന്നതാണ് പദ്ധതി. ദുബൈ ഹോൾഡിങ്ങിനാണ് പാലത്തിന്റെ നിർമാണ കരാർ.
ദുബൈ ക്രീക്കിന് കുറുകെ പോർട്ട് റാശിദ് വികസന മേഖലയെ ഇൻഫിനിറ്റി ബ്രിഡ്ജുമായി ബന്ധിപ്പിക്കുന്നതാണ് 1.42 കിലോമീറ്റർ നീളമുള്ള പാലം. ഇരുദിശകളിലും നാലു വരിയുള്ള പാലത്തിലൂടെ മണിക്കൂറിൽ പതിനാറായിരം വാഹനങ്ങൾക്ക് കടന്നു പോകാനാകും. ക്രീക്കിൽ നിന്ന് 18.5 മീറ്റർ ഉയരത്തിലാണ് പാലം നിർമിക്കുക. ക്രീക്കിലൂടെയുള്ള ജലഗതാഗതം തടസ്സപ്പെടാതിരിക്കാൻ 75 മീറ്റർ വീതിയുള്ള നാവിഗേഷൻ ചാനലുമുണ്ടായിരിക്കും.
