വാഷിംഗ്ടണ്‍: ഡിഫൻസ് സെക്രട്ടറി പീറ്റ് ഹെഗ്‌സെത്തിനെ സ്ഥാനത്തുനിന്നും ഇംപീച്ച്‌ ചെയ്തു പുറത്താക്കാൻ റിപ്പബ്ലിക്കൻ കോണ്‍ഗ്രസ് അംഗം തോമസ് മാസി കൊണ്ടുവരുന്ന പ്രമേയത്തിന് ജനപ്രതിനിധി സഭയിലെ ഡെമോക്രാറ്റുകള്‍ പൂർണ്ണ പിന്തുണ നല്‍കുമെന്ന് ഹൗസ് മൈനോറിറ്റി ലീഡർ ഹക്കീം ജെഫ്രീസ്.
എ.ബി.സിയുടെ ‘ദിസ് വീക്ക്’ പരിപാടിയില്‍ സംസാരിക്കവെയാണ് വരാനിരിക്കുന്ന ഹൗസ് സ്പീക്കർ കൂടിയായ ജെഫ്രീസ് തൻ്റെ ശക്തമായ നിലപാട് വ്യക്തമാക്കിയത്.തൻ്റെ അധികാരം ദുരുപയോഗം ചെയ്യുകയും രാജ്യത്തിന്റെ സുരക്ഷ അപകടത്തിലാക്കുകയും ചെയ്ത ഹെഗ്‌സെത്ത് അടിയന്തരമായി സ്ഥാനമൊഴിയണമെന്ന് ജെഫ്രീസ് ആവശ്യപ്പെട്ടു. ഇറാനുമായുള്ള അനാവശ്യവും ചെലവേറിയതുമായ യുദ്ധത്തിലേക്ക് രാജ്യത്തെ തള്ളിവിട്ട് ജനങ്ങള്‍ക്ക് വൻ സാമ്പത്തിക ബാധ്യത വരുത്തിവെച്ച വ്യക്തിയാണ് ഹെഗ്‌സെത്തെന്ന് അദ്ദേഹം കുറ്റപ്പെടുത്തി. സഭ വീണ്ടും ചേരുമ്പോള്‍ തോമസ് മാസി അവതരിപ്പിക്കുന്ന ഈ പ്രമേയത്തിന് ഡെമോക്രാറ്റിക് കോക്കസിന്റെ വൻ പിന്തുണയുണ്ടാകുമെന്നും പ്രമേയം പാസാക്കാൻ താൻ മുന്നില്‍ നില്‍ക്കുമെന്നും അദ്ദേഹം കൂട്ടിച്ചേർത്തു.
അതേസമയം, ട്രംപിനെ ഇംപീച്ച്‌ ചെയ്യുന്ന കാര്യത്തില്‍ കൂടുതല്‍ ജാഗ്രതയോടെയുള്ള സമീപനമാണ് ജെഫ്രീസ് സ്വീകരിക്കുന്നത്. സ്റ്റീഫൻ മില്ലറെ പുതിയ വൈറ്റ് ഹൗസ് ചീഫ് ഓഫ് സ്റ്റാഫായി ട്രംപ് തെരഞ്ഞെടുത്തത് ‘വളരെ മോശം തീരുമാനം’ ആണെന്ന് വിശേഷിപ്പിച്ച ജെഫ്രീസ്, മില്ലറുമായി യോജിച്ച്‌ പ്രവർത്തിക്കാൻ ഡെമോക്രാറ്റുകള്‍ക്ക് ഒരു അവസരവും ഉണ്ടാകില്ലെന്ന് വ്യക്തമാക്കി. ട്രംപ് ഭരണകൂടം അമേരിക്കൻ ജനതയ്ക്ക് മേല്‍ അടിച്ചേല്‍പ്പിക്കുന്ന തീവ്രവാദ നിലപാടുകളെ കോണ്‍ഗ്രസിന്റെ ഇരുസഭകളിലും ഭൂരിപക്ഷമുള്ള ഡെമോക്രാറ്റുകള്‍ ശക്തമായി പ്രതിരോധിക്കുമെന്നും അദ്ദേഹം മുന്നറിയിപ്പ് നല്‍കി.
