ടെഹ്റാൻ : ഹോർമുസ് കടലിടുക്കിലെ ഇറാന്റെ തന്ത്രപ്രധാന ഇടമായ ഖെഷ്‌മ് ദ്വീപിലേക്ക് അമേരിക്കൻ സൈന്യം പ്രൊജക്റ്റൈല്‍ ആക്രമണം നടത്തിയതായി ഇറാനിയൻ സ്റ്റേറ്റ് മീഡിയ റിപ്പോർട്ട് ചെയ്തു. ഞായറാഴ്ച രാത്രിയിലായിരുന്നു സംഭവം. ഖെഷ്‌മ് ദ്വീപില്‍ നാലിടങ്ങളില്‍ സ്ഫോടനങ്ങളുണ്ടായതായാണ് റിപ്പോർട്ട്.
അതേസമയം, ഹോർമോസ്ഗാൻ പ്രവിശ്യയിലെ ബന്ദർ അബ്ബാസ്, സിരിക് തുടങ്ങിയ നഗരങ്ങളില്‍ കേട്ട സ്ഫോടന ശബ്ദങ്ങള്‍ ഹോർമുസ് കടലിടുക്കില്‍ ഇറാനിയൻ സൈന്യം നടത്തിയ പ്രതിരോധ നീക്കങ്ങളുമായി ബന്ധപ്പെട്ടതാണെന്നും റിപ്പോർട്ടുകള്‍ സ്ഥിരീകരിക്കുന്നു.ഇറാനിലേക്കുള്ള ആയുധ കടത്തും കടല്‍പ്പാതകളിലൂടെയുള്ള ഗതാഗതവും പൂർണ്ണമായി തടയുന്നതിനായി ‘ടാസ്‌ക് ഫോഴ്‌സ് ഐറണ്‍ ഗേറ്റ്’ എന്ന പേരില്‍ പുതിയ സൈനിക പ്രവർത്തനം ആരംഭിച്ചതായി യു.എസ് സെൻട്രല്‍ കമാൻഡ് പ്രഖ്യാപിച്ചു. ലോകചരിത്രത്തിലെ തന്നെ ഏറ്റവും വലിയ നാവിക ഉപരോധമാണ് ഇറാന് മേല്‍ ഏർപ്പെടുത്തിയിരിക്കുന്നതെന്നും, ഇനി ഇറാനിലേക്ക് സാധനങ്ങള്‍ എത്തുന്നതും പുറത്തേക്ക് പോകുന്നതും തടയപ്പെടുമെന്നും യു.എസ് പ്രസിഡന്റ് ഡൊണാള്‍ഡ് ട്രംപ് തന്റെ ട്രൂത്ത് സോഷ്യല്‍ പ്ലാറ്റ്‌ഫോമില്‍ വ്യക്തമാക്കി.
യുദ്ധം വീണ്ടും ആരംഭിച്ചാല്‍ അമേരിക്കയ്ക്കുമേല്‍ “നരകം പെയ്യിക്കും” എന്ന് ഇറാൻ വിദേശകാര്യ മന്ത്രി അബ്ബാസ് അരാഗ്ചി മുന്നറിയിപ്പ് നല്‍കി. എന്നാല്‍, ഇറാന്റെ ആണവ പദ്ധതികളെക്കുറിച്ചും ഹോർമുസ് കടലിടുക്ക് വീണ്ടും തുറക്കുന്നതിനെക്കുറിച്ചുമുള്ള ചർച്ചകളില്‍ പുരോഗതിയുണ്ടായാല്‍ ഇറാനെതിരെയുള്ള ആക്രമണങ്ങള്‍ ഒഴിവാക്കാൻ സാധ്യതയുണ്ടെന്ന് ഡോണള്‍ഡ് ട്രംപും സൂചിപ്പിച്ചു.
ഹോർമുസ് കടലിടുക്കില്‍ അനുമതിയില്ലാതെ സഞ്ചരിച്ച മൂന്ന് എണ്ണക്കപ്പലുകളില്‍ സ്ഫോടനവും തീപിടുത്തവും ഉണ്ടായതായി ഇറാന്റെ ഇസ്‌ലാമിക് റെവല്യൂഷണറി ഗാർഡ് കോർപ്സ് സ്ഥിരീകരിച്ചു. സൗദി തലസ്ഥാനമായ റിയാദിലേക്ക് ബാലിസ്റ്റിക് മിസൈല്‍ ആക്രമണം നടത്തിയതിന് മറുപടിയായി യെമനില്‍ പ്രത്യാക്രമണം നടത്തിയ സൗദി സഖ്യസേന, രണ്ട് മിസൈല്‍ ലോഞ്ചറുകള്‍ തകർത്തതായി അറിയിച്ചു. ഇതിനിടെ മധ്യ ഗാസയില്‍ കനത്ത മഴയെ തുടർന്ന് മണല്‍തിട്ട ഇടിഞ്ഞുവീണ് നാല് കുട്ടികള്‍ ഉള്‍പ്പെടെ അഞ്ച് ഫലസ്തീനികള്‍ മരണപ്പെട്ട വിവരവും പുറത്തുവന്നിട്ടുണ്ട്.
അമേരിക്കയിലെ ഇടക്കാല തിരഞ്ഞെടുപ്പ് ഫലങ്ങള്‍ പുറത്തുവന്നതോടെ വാഷിംഗ്ടണുമായുള്ള സമാധാന ചർച്ചകള്‍ നിശ്ചലമെന്ന് ഇറാൻ വിദേശകാര്യ മന്ത്രി അബ്ബാസ് അരാഗ്ചി പറഞ്ഞു. തിരഞ്ഞെടുപ്പ് ഫലങ്ങള്‍ സർപ്രൈസ് ആണെന്നും അന്തരീക്ഷം ശാന്തമായാല്‍ മാത്രമേ മധ്യസ്ഥ ചർച്ചകള്‍ പുനരാരംഭിക്കാൻ സാധിക്കൂ എന്നും അദ്ദേഹം കൂട്ടിച്ചേർത്തു.
അതേസമയം, ഫ്ലോറിഡയിലെ ഗവർണർ സ്ഥാനത്തേക്ക് വിജയിച്ച ബൈറണ്‍ ഡൊണാള്‍ഡ്സ് ഇറാനുമായുള്ള സംഘർഷങ്ങള്‍ ഉടൻ അവസാനിക്കുമെന്ന പ്രത്യാശ പ്രകടിപ്പിച്ചു. ഇന്ധനവില കുതിച്ചുയരുന്ന സാഹചര്യത്തില്‍ ഈ യുദ്ധം അവസാനിക്കുന്നത് സാമ്പത്തിക രംഗത്തിന് ആശ്വാസമാകുമെന്നും, സാധാരണക്കാരുടെ പ്രധാന ആശങ്ക വിലക്കയറ്റമാണെന്നും അദ്ദേഹം ചൂണ്ടിക്കാട്ടി.
