തെൽ അവീവ് : ചൊവ്വാഴ്ച നടന്ന ഇസ്രായേൽ പൊതുതിരഞ്ഞെടുപ്പിൽ പ്രധാന മുന്നണികൾക്കൊന്നും വ്യക്തമായ ഭൂരിപക്ഷം ലഭിക്കില്ലെന്ന് എക്സിറ്റ് പോൾ പ്രവചനങ്ങൾ. ഇതോടെ രാജ്യം വീണ്ടുമൊരു രാഷ്ട്രീയ അനിശ്ചിതത്വത്തിലേക്ക് നീങ്ങുകയാണ്. ബെഞ്ചമിൻ നെതന്യാഹുവോ അദ്ദേഹത്തിന്റെ എതിരാളികളോ അടുത്ത പ്രധാനമന്ത്രിയാകാൻ ആഴ്ചകൾ നീളുന്ന സഖ്യചർച്ചകൾ വേണ്ടിവരുമെന്നാണ് സൂചന.
സഖ്യരൂപീകരണം പരാജയപ്പെട്ടാൽ രാജ്യം വീണ്ടുമൊരു പൊതുതിരഞ്ഞെടുപ്പിലേക്ക് പോകേണ്ടി വരും. വ്യക്തികൾക്കല്ല, രാഷ്ട്രീയ പാർട്ടികൾക്ക് വോട്ട് ചെയ്യുന്ന ഇസ്രായേൽ രീതിയാണ് നിലവിലെ പ്രതിസന്ധിക്ക് കാരണം.120 അംഗങ്ങളുള്ള ഇസ്രായേൽ പാർലമെന്റായ ‘നെസെറ്റിൽ’ സർക്കാർ രൂപീകരിക്കാൻ 61 സീറ്റുകളുടെ ഭൂരിപക്ഷമാണ് വേണ്ടത്. എന്നാൽ പ്രധാന പാർട്ടികൾക്കൊന്നും ഈ മാന്ത്രികസംഖ്യ തികയ്ക്കാനാകില്ലെന്നാണ് പുറത്തുവരുന്ന സൂചനകൾ. പല പാർട്ടികളെ കൂട്ടുപിടിച്ച് ഒരു സഖ്യസർക്കാർ ഉണ്ടാക്കുക മാത്രമാണ് ഇനി മുന്നിലുള്ള വഴി.
പ്രവചിക്കപ്പെടുന്ന സീറ്റ് നില : നെതന്യാഹു സഖ്യം: 50 സീറ്റുകൾ
പ്രതിപക്ഷം (ഗാഡി ഐസൻകോട്ട്): 52 – 53 സീറ്റുകൾ
അറബ് പാർട്ടികൾ: 17 – 18 സീറ്റുകൾ
ഇരു മുന്നണികൾക്കും 61 സീറ്റുകൾ തികയ്ക്കാൻ സാധിക്കാതെ വന്നാൽ, വരും മാസങ്ങളിൽ പുതിയ തിരഞ്ഞെടുപ്പ് നടക്കുന്നത് വരെ നെതന്യാഹുവിന്റെ നേതൃത്വത്തിലുള്ള നിലവിലെ സർക്കാർ താൽക്കാലിക കാവൽ സർക്കാരായി തുടരും. ഇത്തവണ മികച്ച മുന്നേറ്റം കാഴ്ചവെച്ച അറബ് പാർട്ടികൾക്ക് കിങ് മേക്കറാകാൻ സാധിക്കുമെങ്കിലും, അവരുമായി സഖ്യമുണ്ടാക്കാൻ പ്രധാന മുന്നണികൾ ഇതുവരെ തയ്യാറായിട്ടില്ല.
പ്രാദേശിക സമയം ചൊവ്വാഴ്ച രാത്രി 10 മണിയോടെ വോട്ടെടുപ്പ് അവസാനിച്ചയുടൻ രാജ്യത്തെ പ്രധാന മൂന്ന് ടെലിവിഷൻ ചാനലുകളാണ് എക്സിറ്റ് പോൾ ഫലങ്ങൾ പുറത്തുവിട്ടത്. വോട്ടിങ് രീതിയുടെ ഏകദേശ ചിത്രം ഇവ നൽകുന്നുണ്ടെങ്കിലും, വരും ദിവസങ്ങളിൽ പുറത്തുവരുന്ന ഔദ്യോഗിക ഫലങ്ങളിൽ നേരിയ മാറ്റങ്ങൾ ഉണ്ടായേക്കാം.വരും ആഴ്ചകളിൽ പാർട്ടികൾ തമ്മിൽ കടുത്ത കുതിരക്കച്ചവടത്തിനും ചർച്ചകൾക്കും രാജ്യം സാക്ഷ്യം വഹിക്കും. ഇസ്രായേൽ പ്രസിഡന്റ് ഐസക് ഹെർസോഗ് എല്ലാ പാർട്ടി നേതാക്കളുമായും കൂടിയാലോചനകൾ നടത്തിയ ശേഷം, സഖ്യം രൂപീകരിക്കാൻ കൂടുതൽ സാധ്യതയുള്ള നേതാവിനെ സർക്കാർ ഉണ്ടാക്കാൻ ക്ഷണിക്കും.
ആറ് ആഴ്ചയ്ക്കുള്ളിൽ ഭൂരിപക്ഷം തെളിയിക്കാൻ ക്ഷണിക്കപ്പെട്ട നേതാവിന് കഴിഞ്ഞില്ലെങ്കിൽ, മറ്റുള്ളവർക്ക് അവസരം നൽകും. ഈ സാഹചര്യം ചെറിയ പാർട്ടികളുടെ രാഷ്ട്രീയ സ്വാധീനം വലിയ തോതിൽ ഉയർത്തുന്നുണ്ട്. ഭൂരിപക്ഷം ഒപ്പിക്കാനായി വലിയ പാർട്ടികൾ ഇവർക്ക് മന്ത്രിസ്ഥാനങ്ങളും വൻ ബജറ്റുകളും വാഗ്ദാനം ചെയ്യുമെന്നാണ് റിപ്പോർട്ടുകൾ.
