വാഷിംഗ്ടൺ / ക്വാലാലംപൂർ: അന്താരാഷ്ട്ര ജലപാതകൾ തടസ്സപ്പെടുത്തുന്ന ഉപരോധ നടപടികൾ ലോകവ്യാപാരത്തിനും സാമ്പത്തിക ഭദ്രതയ്ക്കും വലിയ ഭീഷണിയാണെന്ന് യു.എസ് സ്റ്റേറ്റ് സെക്രട്ടറി മാർക്കോ റൂബിയോ. ആസിയാൻ (ASEAN) ഉച്ചകോടിയിൽ സംസാരിക്കവെയാണ് അന്താരാഷ്ട്ര തലത്തിൽ വൻ പ്രതിസന്ധി സൃഷ്ടിക്കുന്ന ഇത്തരം നീക്കങ്ങൾക്കെതിരെ അമേരിക്കൻ വിദേശകാര്യ മേധാവി രൂക്ഷമായ ഭാഷയിൽ മുന്നറിയിപ്പ് നൽകിയത്.
ഇത്തരം തടസ്സപ്പെടുത്തലുകൾ ഏഷ്യ ഉൾപ്പെടെ ലോകത്തിലെ മറ്റ് സുപ്രധാന മേഖലകളിലും ആവർത്തിക്കപ്പെടാൻ സാധ്യതയുള്ള “വളരെ അപകടകരമായ കീഴ്വഴക്കമാണ്” സൃഷ്ടിക്കുന്നതെന്ന് റൂബിയോ ചൂണ്ടിക്കാട്ടി. ഇത് ആഗോള വാണിജ്യമേഖലയെ തകിടം മറിക്കുമെന്നും അദ്ദേഹം ആശങ്ക പ്രകടിപ്പിച്ചു. പശ്ചിമേഷ്യൻ സംഘർഷത്തിന് സമാധാനപരമായ പരിഹാരം കാണുന്നതിന് ചർച്ചകൾക്ക് വാഷിംഗ്ടൺ ഇപ്പോഴും സന്നദ്ധമാണെന്ന് വ്യക്തമാക്കിയ റൂബിയോ, എന്നാൽ എതിർപക്ഷത്തിന്റെ നിലപാടുകളിൽ കടുത്ത നിരാശ പ്രകടിപ്പിച്ചു.
“സമാധാന ചർച്ചകളിലൂടെ പ്രശ്നപരിഹാരം കാണാൻ ഞങ്ങൾ സന്നദ്ധരാണ്. എന്നാൽ എതിർപക്ഷം ഈ ചർച്ചകളെ തെല്ലും ഗൗരവത്തോടെയല്ല കാണുന്നത് എന്നതാണ് ഞങ്ങൾ നേരിടുന്ന പ്രധാന വെല്ലുവിളി,” – മാർക്കോ റൂബിയോ പറഞ്ഞു. വ്യാപാര പാതകളിലെ സുരക്ഷ ഉറപ്പാക്കുന്നതിനും അന്താരാഷ്ട്ര നിയമങ്ങൾ പാലിക്കപ്പെടുന്നുണ്ടെന്ന് ഉറപ്പുവരുത്തുന്നതിനും ലോകരാഷ്ട്രങ്ങൾ ഒന്നിച്ച് നിൽക്കണമെന്ന് ആസിയാൻ വേദിയിൽ യു.എസ് ആവശ്യപ്പെട്ടു.
