ടെഹ്റാൻ: മേഖലയിൽ സംഘർഷം തുടരുന്നതിനിടെ, അമേരിക്കയുടെ അത്യാധുനിക എഫ്-35 (F-35) യുദ്ധവിമാനം തങ്ങളുടെ വ്യോമപ്രതിരോധ സംവിധാനം വെടിവെച്ചിട്ടതായി ഇറാൻ അവകാശപ്പെട്ടു. ഫെബ്രുവരി 28-ന് സംഘർഷം ആരംഭിച്ചതിന് ശേഷം ഒരു എഫ്-35 വിമാനം തകർക്കുന്നതായി ഇറാൻ അവകാശപ്പെടുന്ന രണ്ടാമത്തെ സംഭവമാണിത്.ബ്രിട്ടനിലെ ആർ.എ.എഫ് ലേക്കൻഹീത്തുമായി ബന്ധപ്പെട്ട സ്ക്വാഡ്രണിലെ വിമാനമാണ് തങ്ങൾ ലക്ഷ്യം വെച്ചതെന്ന് ഇറാൻ്റെ ഔദ്യോഗിക മാധ്യമമായ ഇസ്ലാമിക് റിപ്പബ്ലിക് ഓഫ് ഇറാൻ ബ്രോഡ്കാസ്റ്റിംഗ് റിപ്പോർട്ട് ചെയ്തു.
സെൻട്രൽ ഇറാനിൽ വെച്ച് വിമാനം തകർന്നു വീണതായും പൈലറ്റ് കൊല്ലപ്പെട്ടിരിക്കാൻ സാധ്യതയുണ്ടെന്നും ഖാത്തം അൽ-അൻബിയ സെൻട്രൽ ആസ്ഥാനത്തെ ഉദ്ധരിച്ച് ഇറാൻ സൈനിക വൃത്തങ്ങൾ അറിയിച്ചു. എന്നാൽ ഈ അവകാശവാദത്തിന് സ്വതന്ത്രമായ സ്ഥിരീകരണം ഇതുവരെ ലഭ്യമായിട്ടില്ല.
നേരത്തെ മാർച്ച് 19-നും ഒരു എഫ്-35 വിമാനം ആക്രമിച്ചതായി ഇറാൻ അവകാശപ്പെട്ടിരുന്നു. അന്ന് ആക്രമണത്തിൽ വിമാനത്തിന് കേടുപാടുകൾ സംഭവിക്കുകയും മിഡിൽ ഈസ്റ്റിലെ ഒരു സൈനിക താവളത്തിൽ അടിയന്തരമായി ഇറക്കുകയും ചെയ്തിരുന്നു. എന്നാൽ വിമാനം സുരക്ഷിതമായി ഇറക്കിയെന്നും പൈലറ്റ് സുരക്ഷിതനാണെന്നുമാണ് അന്ന് യുഎസ് സെൻട്രൽ കമാൻഡ് പ്രതികരിച്ചത്.
ലോകത്തിലെ ഏറ്റവും അത്യാധുനികവും ചിലവേറിയതുമായ അഞ്ചാം തലമുറ യുദ്ധവിമാനമാണ് എഫ്-35. ഏകദേശം 100 മില്യൺ ഡോളറിലധികം വിലമതിക്കുന്ന ഈ വിമാനങ്ങൾ അമേരിക്കൻ വ്യോമശക്തിയുടെ നട്ടെല്ലായിട്ടാണ് കരുതപ്പെടുന്നത്. ഫെബ്രുവരിയിൽ സംഘർഷം രൂക്ഷമായത് മുതൽ അമേരിക്കയും ഇസ്രായേലും എഫ്-35 വിമാനങ്ങൾ വ്യാപകമായി ഉപയോഗിച്ചുവരികയാണ്. ഇതിനിടെയുള്ള ഇറാൻ്റെ പുതിയ അവകാശവാദം മേഖലയിലെ സൈനിക സമവാക്യങ്ങളിൽ വലിയ ചർച്ചകൾക്ക് വഴിവെച്ചിരിക്കുകയാണ്.
