മിഡിൽ ഈസ്റ്റിൽ യുദ്ധഭീതി നിലനിൽക്കുന്നതിനിടെ ഇറാനും അമേരിക്കയും തമ്മിലുള്ള അന്തിമ ഘട്ട ചർച്ചകൾ മാർച്ചിൽ നടക്കുമെന്ന് റിപ്പോർട്ട്. മാസങ്ങളായി തുടരുന്ന അനിശ്ചിതത്വങ്ങൾക്കും സൈനിക നീക്കങ്ങൾക്കും ശേഷം ഒരു താൽക്കാലിക ധാരണയിലെത്താൻ (Interim Deal) ഇരുരാജ്യങ്ങളും ശ്രമിക്കുന്നതായി മുതിർന്ന ഇറാനിയൻ ഉദ്യോഗസ്ഥരെ ഉദ്ധരിച്ച് അന്താരാഷ്ട്ര മാധ്യമങ്ങൾ റിപ്പോർട്ട് ചെയ്യുന്നു. ഫെബ്രുവരിയിൽ ഒമാനിലും ജനീവയിലും നടന്ന പരോക്ഷ ചർച്ചകളുടെ തുടർച്ചയായാണിത്.
ഇറാന്റെ ആണവ പരിപാടികൾക്ക് നിയന്ത്രണം ഏർപ്പെടുത്തുന്നതിന് പകരമായി ഇറാന് മേലുള്ള സാമ്പത്തിക ഉപരോധങ്ങൾ നീക്കുന്നതിലാണ് പ്രധാനമായും ചർച്ചകൾ കേന്ദ്രീകരിക്കുന്നത്. യുറേനിയം സമ്പുഷ്ടീകരണം നിശ്ചിത വർഷത്തേക്ക് താൽക്കാലികമായി നിർത്തിവെക്കാമെന്നും പകരം അമേരിക്കയിലുള്ള ഇറാന്റെ മരവിപ്പിച്ച ആസ്തികൾ (Frozen Assets) വിട്ടുനൽകണമെന്നും ഇറാൻ നിർദ്ദേശിച്ചിട്ടുണ്ട്. എന്നാൽ ഉപരോധങ്ങൾ പൂർണ്ണമായി നീക്കുന്ന കാര്യത്തിൽ ഇരുപക്ഷവും തമ്മിൽ ഇപ്പോഴും അഭിപ്രായ വ്യത്യാസങ്ങൾ നിലനിൽക്കുന്നുണ്ട്.
അമേരിക്കൻ പ്രസിഡന്റ് ഡൊണാൾഡ് ട്രംപിന്റെ ‘റെഡ് ലൈനുകൾ’ (Red Lines) അംഗീകരിക്കാൻ ഇറാൻ തയ്യാറാകാത്തത് ചർച്ചകളിൽ വെല്ലുവിളിയായി തുടരുന്നു. ആണവ പദ്ധതികൾക്ക് പുറമെ ഇറാന്റെ മിസൈൽ പ്രോഗ്രാമും പ്രാദേശിക ഗ്രൂപ്പുകൾക്കുള്ള പിന്തുണയും ചർച്ചകളിൽ ഉൾപ്പെടുത്തണമെന്ന് അമേരിക്ക ആവശ്യപ്പെടുമ്പോൾ, ആണവ വിഷയത്തിൽ മാത്രമേ വിട്ടുവീഴ്ചയ്ക്കുള്ളൂ എന്നാണ് ഇറാന്റെ നിലപാട്. മാർച്ച് ആദ്യവാരം നടക്കുന്ന ചർച്ചകൾ പശ്ചിമേഷ്യയിലെ സമാധാന ശ്രമങ്ങളിൽ നിർണ്ണായകമാകും.
