മ്യൂണിക്ക് : അമേരിക്കൻ ഭരണകൂടത്തിൽ നിന്ന് അടുത്തകാലത്തുണ്ടായ ചില ബഹുമാന സൂചകമായ നടപടികൾ തങ്ങളെ പ്രോത്സാഹിപ്പിക്കുന്നതായി ചൈനീസ് വിദേശകാര്യ മന്ത്രി വാങ് യി. മ്യൂണിക്ക് സെക്യൂരിറ്റി കോൺഫറൻസിൽ സംസാരിക്കവേയാണ് അദ്ദേഹം ഈ അഭിപ്രായപ്രകടനം നടത്തിയത്. ഈ ഏപ്രിലിൽ അമേരിക്കൻ പ്രസിഡന്റ് ഡോണൾഡ് ട്രംപ് ചൈന സന്ദർശിക്കാനിരിക്കെ, ഇരു രാജ്യങ്ങളും തമ്മിലുള്ള ബന്ധം കൂടുതൽ സുസ്ഥിരമാക്കാനുള്ള ശ്രമത്തിലാണ് ബീജിംഗ്.
ചൈനയെ ആക്രമിക്കാനും മോശമായി ചിത്രീകരിക്കാനും അമേരിക്കയിലെ ചിലർ ശ്രമിക്കുന്നുണ്ടെന്ന് വാങ് യി ആരോപിച്ചു. ചൈനയുമായുള്ള വിതരണ ശൃംഖലകൾ വിച്ഛേദിക്കുന്ന വൈകാരികമായ നീക്കങ്ങൾക്ക് പകരം ഇരു രാജ്യങ്ങളും സഹകരിച്ച് പ്രവർത്തിക്കുന്നതാണ് ലോകത്തിന് നല്ലതെന്ന് അദ്ദേഹം പറഞ്ഞു. ഏതുതരം വെല്ലുവിളികളെയും നേരിടാൻ ചൈന തയ്യാറാണെന്നും അദ്ദേഹം കൂട്ടിച്ചേർത്തു.
ട്രംപ് ഷി ജിൻപിംഗിനോടും ചൈനീസ് ജനതയോടും കാണിക്കുന്ന ആദരവ് ശ്രദ്ധേയമാണ്. 2026 വർഷത്തെ ചൈനയും അമേരിക്കയും തമ്മിലുള്ള പരസ്പര ബഹുമാനത്തിന്റെയും സഹകരണത്തിന്റെയും വർഷമാക്കി മാറ്റാനാണ് തങ്ങൾ ആഗ്രഹിക്കുന്നതെന്ന് വാങ് യി വ്യക്തമാക്കി.
യുക്രെയ്ൻ ഉൾപ്പെടെയുള്ള പ്രാദേശിക പ്രശ്നങ്ങൾ ചർച്ചകളിലൂടെ മാത്രമേ പരിഹരിക്കാവൂ എന്നാണ് ചൈനയുടെ നിലപാട്. സമാധാന ചർച്ചകൾക്കായി ചൈന സജീവമായി രംഗത്തുണ്ട്.യുക്രെയ്ൻ സമാധാന ചർച്ചകളിൽ നിന്ന് യൂറോപ്പ് മാറിനിൽക്കരുത്. ചർച്ചകളിൽ പങ്കെടുക്കാൻ യൂറോപ്പിന് പൂർണ്ണ അവകാശമുണ്ട്. “യൂറോപ്പ് ചർച്ചാ മേശയ്ക്ക് ചുറ്റുമുണ്ടാകണം, അല്ലാതെ വിഭവപ്പട്ടികയിൽ ആകരുത്” എന്ന് അദ്ദേഹം പറഞ്ഞു. ഇതിലൂടെ ചർച്ചകളിൽ യൂറോപ്യൻ രാജ്യങ്ങൾ നിർണ്ണായക പങ്ക് വഹിക്കണമെന്നാണ് അദ്ദേഹം സൂചിപ്പിച്ചത്.ചൈനയും യൂറോപ്യൻ യൂണിയനും പരസ്പര എതിരാളികളല്ലെന്നും മറിച്ച് പങ്കാളികളാണെന്നും വാങ് യി ഊന്നിപ്പറഞ്ഞു. അമേരിക്കൻ വിദേശകാര്യ സെക്രട്ടറി മാർക്കോ റൂബിയോയുമായും വാങ് യി കൂടിക്കാഴ്ച നടത്തി.
