ഡോ. മധു നമ്പ്യാർ
ലാന്ഹം: മേരിലാൻഡിൽ സ്ഥിതി ചെയ്യുന്ന ശ്രീ ശിവ വിഷ്ണു ക്ഷേത്രത്തിൽ (SSVT) പുതുവത്സരത്തെ ഭക്തിസാന്ദ്രമായ അന്തരീക്ഷത്തിൽ സർവദൈവ പൂജയോടെ ആചരിച്ചു. എല്ലാ ദേവതകളെയും ഒരുമിച്ച് ആരാധിക്കുന്ന ഈ മഹത്തായ ആചാരത്തിലൂടെ പുതുവത്സരത്തെ സ്വാഗതം ചെയ്യുന്നത് ക്ഷേത്രത്തിന്റെ ദീർഘകാല പാരമ്പര്യത്തിന്റെ ഭാഗമാണ്.
ഡിസംബർ 31-ന് രാത്രി 11.30 മണിയോടെ ക്ഷേത്രത്തിലെ ആചാര്യന്മാരും ഭരണസമിതിയംഗങ്ങളും ഒന്നിച്ചുചേർന്ന് സർവദൈവ പൂജയ്ക്ക് തുടക്കമിട്ടു. പുതുവത്സരത്തിലേക്ക് കടക്കുന്ന ആ വിശുദ്ധ നിമിഷങ്ങളിൽ, ഭക്തരെല്ലാവരും ചേർന്ന് ശ്ലോകോച്ചാരണങ്ങളിലൂടെ കൃപയും ആരോഗ്യവും സമാധാനവും സമൃദ്ധിയും നിറഞ്ഞ ഒരു പുതുവർഷത്തിനായി പ്രാർത്ഥിച്ചു.
പൂജയ്ക്ക് തുടക്കം കുറിച്ചത് വിഘ്നേശ്വരനായ മഹാഗണപതിയോടുള്ള ആരാധനയോടെയായിരുന്നു. എല്ലാ തടസ്സങ്ങളും നീക്കി, ശുഭാരംഭത്തിന് വഴിയൊരുക്കുന്ന ഗണപതിയുടെ അനുഗ്രഹത്തോടെ ആരംഭിച്ച സർവദൈവ പൂജയിൽ തുടർന്ന് സരസ്വതി ദേവി, പാർവ്വതി ദേവി, ലക്ഷ്മി ദേവി, ശ്രീകൃഷ്ണൻ, ആണ്ടാൾ, ശ്രീ വെങ്കടേശ്വരൻ, ശ്രീ ആഞ്ജനേയൻ, ശ്രീരാമൻ, സീതാദേവി, ലക്ഷ്മണൻ, ശ്രീ പദ്മനാഭസ്വാമി, നവഗ്രഹങ്ങൾ, ശ്രീശിവൻ, ദുർഗാദേവി, ശ്രീ അയ്യപ്പൻ എന്നിവർക്കും പ്രത്യേക പൂജകൾ അർപ്പിച്ചു. സർവദൈവ പൂജയുടെ സമാപനം ശ്രീ സുബ്രഹ്മണ്യ സ്വാമിയോടുള്ള പ്രാർത്ഥനകളോടെയായിരുന്നു.
സർവദൈവ പൂജ എല്ലാ ദേവതാരൂപങ്ങളുടെയും ഏകത്വം ഓർമ്മിപ്പിക്കുന്ന അത്യന്തം പ്രാധാന്യമുള്ള ആരാധനാക്രമമാണ്. വിവിധ ദേവതകളുടെ അനുഗ്രഹം ഒരുമിച്ച് ലഭിക്കുമെന്ന വിശ്വാസത്തോടൊപ്പം, ജീവിതത്തിലെ സമത്വവും ഐക്യവും ആത്മീയ സമ്പൂർണതയും പ്രാർത്ഥിക്കുന്ന ഒരു വിശുദ്ധ അവസരവുമാണ് ഇത്. പുതുവത്സരാരംഭം ഇത്തരമൊരു മഹത്തായ പൂജയോടെ ആരംഭിക്കുന്നത് വർഷം മുഴുവൻ ദൈവകൃപയും മനസ്സമാധാനവും നിലനിൽക്കുമെന്ന വിശ്വാസം നൽകുന്നു.
ഈ അവസരത്തിൽ ക്ഷേത്രം മനോഹരമായ അലങ്കാരങ്ങളാൽ ശോഭിച്ചു. ദീപങ്ങളാലും പുഷ്പങ്ങളാലും അലങ്കരിച്ച സന്നിധികൾ ഭക്തരുടെ ഹൃദയങ്ങളിൽ ആത്മീയാനന്ദം നിറച്ചു. പൂജകൾക്കുശേഷം ആചാര്യന്മാർ എല്ലാ ഭക്തർക്കും പ്രത്യേകം അനുഗ്രഹം നൽകി.
തുടർന്ന് പ്രസാദവിതരണവും നടന്നു. ചടങ്ങുകൾ ‘ഹരിവരാസനം’ എന്ന ദിവ്യഗീതത്തിന്റെ ആലാപനത്തോടെ സമാപിച്ചു. ഭക്തിസാന്ദ്രമായ ആ സംഗീതം പുതുവത്സരത്തിന്റെ ആദ്യ നിമിഷങ്ങളെ ആത്മീയ സമാധാനത്തോടെയും പ്രത്യാശയോടെയും നിറച്ചു.
ശ്രീ ശിവ വിഷ്ണു ക്ഷേത്രത്തിലെ പുതുവത്സരാഘോഷങ്ങൾ, ദൈവസാന്നിധ്യത്തിൽ പുതുവർഷം ആരംഭിക്കുന്നതിന്റെ മഹത്വവും, കൂട്ടായ പ്രാർത്ഥനയുടെ ശക്തിയും വീണ്ടും ഒരിക്കൽ കൂടി ഓർമ്മിപ്പിച്ചു.
