മലപ്പുറം: നിപ സമ്പർക്കപട്ടികയിലെ സ്ത്രീ മരിച്ചു. കോട്ടക്കൽ സ്വദേശിനിയാണ് മരിച്ചത്. മങ്കടയിൽ നിപ ബാധിച്ച് മരിച്ച പെൺകുട്ടിക്കൊപ്പം ആശുപത്രിയിലെ തീവ്രപരിശോധനാ വിഭാഗത്തിൽ ചികിത്സയിൽ ഉണ്ടായിരുന്ന സ്ത്രീയാണിത്.
മൃതദേഹം സംസ്കരിക്കാനുള്ള ബന്ധുക്കളുടെ നീക്കം ആരോഗ്യ വകുപ്പ് അധികൃതർ തടഞ്ഞു. നിപ പരിശോധനാ ഫലം വരുന്നതുവരെ മൃതതദേഹം സംസ്കരിക്കരുതെന്ന് ആരോഗ്യ വകുപ്പ് നിർദേശം നൽകി.
അതേസമയം, മലപ്പുറം ജില്ലയില് നിപ ബാധിച്ച വ്യക്തിയുടെ സമ്പര്ക്ക പട്ടികയിലുള്ള 241 പേരാണുള്ളത്. മലപ്പുറത്ത് 12 പേരാണ് ചികിത്സയിലുള്ളത്. ഇതിൽ അഞ്ചു പേരെ ഐ.സി.യുവിലാണ് പ്രവേശിപ്പിച്ചിട്ടുള്ളത്.
സംസ്ഥാനത്ത് നിലവില് ആകെ 383 പേരാണ് നിപ സമ്പര്ക്കപ്പട്ടികയില് ഉള്ളത്. മലപ്പുറം ജില്ലയില് നിപ ബാധിച്ച വ്യക്തിയുടെ സമ്പര്ക്ക പട്ടികയിൽ 241 പേരും പാലക്കാട് നിപ രോഗിയുടെ സമ്പര്ക്കപ്പട്ടികയിൽ 142 പേരും നിരീക്ഷണത്തിലാണ്.
ആകെ സമ്പര്ക്ക പട്ടികയിലുള്ളവരില് 94 പേര് കോഴിക്കോട് ജില്ലയിലും രണ്ടുപേര് എറണാകുളം ജില്ലയിലുമാണ് നിരീക്ഷണത്തിലുള്ളത്. പാലക്കാട് നാലു പേര് ഐസൊലേഷനില് ചികിത്സയിലാണ്.
വീടുകളിലെ സന്ദര്ശനവും പനി സര്വൈലന്സും നടത്തി വരികയാണ്. ഐസൊലേഷനിലുള്ളവരെ ഫോണില് വിളിച്ച് മാനസിക പിന്തുണ ഉറപ്പാക്കുന്നുണ്ട്. ചികിത്സക്കായി എത്തുന്ന രോഗികളുടെ വർധന മുന്നിൽകണ്ട് കൂടുതല് ഐ.സി.യു, ഐസൊലേഷന് സൗകര്യങ്ങള് ജില്ലകളില് ഉറപ്പാക്കിയിട്ടുണ്ട്.
