വാഷിംഗ്ടൺ: യുഎസ് പ്രസിഡന്റ് ഡോണൾഡ് ട്രംപ് ബിബിസിക്കെതിരെ ഫയൽ ചെയ്ത 10 ബില്യൺ ഡോളറിന്റെ (ഏകദേശം 7.5 ബില്യൺ പൗണ്ട്) മാനനഷ്ടക്കേസ് മുന്നോട്ട് കൊണ്ടുപോകാൻ ഫ്ലോറിഡയിലെ ഫെഡറൽ കോടതി അനുമതി നൽകി. കേസ് തള്ളിക്കളയണമെന്ന ബിബിസിയുടെ ആവശ്യം ജഡ്ജി ജെഫ്രി കുന്റ്‌സ് ഭാഗികമായി നിരസിച്ചു. എന്നാൽ, ഫ്ലോറിഡ സംസ്ഥാനത്തെ അന്യായമായ വ്യാപാര രീതികൾക്കെതിരെയുള്ള നിയമപ്രകാരം ട്രംപ് ഉന്നയിച്ച രണ്ടാമത്തെ വാദം കോടതി തള്ളിക്കളഞ്ഞു.
2021 ജനുവരി 6-ന് യുഎസ് ക്യാപിറ്റോളിന് മുന്നിൽ ട്രംപ് നടത്തിയ പ്രസംഗത്തിന്റെ രണ്ട് വ്യത്യസ്ത ഭാഗങ്ങൾ കൂട്ടിച്ചേർത്ത് ബിബിസിയുടെ ‘പനോരമ’ എന്ന പരിപാടിയിൽ സംപ്രേഷണം ചെയ്തതിനെതിരെയാണ് ട്രംപ് കോടതിയെ സമീപിച്ചത്. പ്രസംഗം മനഃപൂർവ്വം തെറ്റിദ്ധരിപ്പിക്കുന്ന രീതിയിൽ എഡിറ്റ് ചെയ്തുവെന്നാണ് ട്രംപിന്റെ ആരോപണം. നേരത്തെ, ട്രംപ് അക്രമത്തിന് നേരിട്ട് ആഹ്വാനം ചെയ്തു എന്ന തെറ്റായ ധാരണ നൽകാൻ ഈ സംപ്രേഷണം ഇടയാക്കിയെന്ന് സമ്മതിച്ച ബിബിസി ഇതിൽ ക്ഷമാപണം നടത്തിയിരുന്നു.
മാനനഷ്ടക്കേസ് നിലനിൽക്കാൻ ആവശ്യമായ പ്രാഥമിക തെളിവുകൾ ഉണ്ടെന്ന് ജഡ്ജി ജെഫ്രി കുന്റ്‌സ് നിരീക്ഷിച്ചു. എന്നാൽ, കേസിന്റെ മെറിറ്റിലേക്ക് കടന്നിട്ടില്ലെന്നും ട്രംപിന് ഇത് തെളിയിക്കാനാകുമോ എന്നത് വിചാരണ ഘട്ടത്തിൽ തീരുമാനിക്കുമെന്നും അദ്ദേഹം വ്യക്തമാക്കി. ഡോക്യുമെന്ററി ഒരു വാണിജ്യ സംപ്രേഷണമല്ലെന്ന് ചൂണ്ടിക്കാട്ടിയാണ് വ്യാപാര നിയമലംഘനവുമായി ബന്ധപ്പെട്ട വാദം ജഡ്ജി തള്ളിയത്.കോടതി വിധി “വലിയ വിജയമാണെന്ന്” ട്രംപ് തന്റെ സോഷ്യൽ മീഡിയ പ്ലാറ്റ്‌ഫോമായ ‘ട്രൂത്ത് സോഷ്യലിൽ’ കുറിച്ചു.
അതേസമയം, കോടതി വിധിയിൽ ആശ്ചര്യമുണ്ടെങ്കിലും കോടതിയെ ബഹുമാനിക്കുന്നുവെന്നും നിയമപരമായ തുടർനടപടികളുമായി മുന്നോട്ട് പോകുമെന്നും ബിബിസി വക്താവ് പ്രതികരിച്ചു.കേസുമായി ബന്ധപ്പെട്ട് ഡിസംബർ 11-നകം സത്യപ്രതിജ്ഞ ചെയ്ത് ചോദ്യങ്ങൾക്ക് മറുപടി നൽകാൻ കോടതി കഴിഞ്ഞ മാസം ട്രംപിനോട് ഉത്തരവിട്ടിരുന്നു. തിരഞ്ഞെടുപ്പ് പ്രചാരണത്തിരക്കുകൾ കാരണം നേരത്തെ നിശ്ചയിച്ചിരുന്ന തീയതിയിൽ ട്രംപ് ഹാജരായിരുന്നില്ല.
പ്രസ്തുത ഡോക്യുമെന്ററി അമേരിക്കയിൽ ലഭ്യമായിരുന്നില്ല എന്നായിരുന്നു ബിബിസിയുടെ പ്രധാന വാദം. ഇത് അമേരിക്കയിലെ സബ്സ്ക്രിപ്ഷൻ പ്ലാറ്റ്‌ഫോമുകളിലോ വെബ്‌സൈറ്റിലോ ലഭ്യമായിരുന്നു എന്നതിന് തെളിവില്ലെന്ന് ട്രംപിന്റെ അഭിഭാഷകർ നേരത്തെ സമ്മതിച്ചിരുന്നു. തുടർന്ന് ബിബിസിയുടെ വാണിജ്യ വിഭാഗമായ ‘ബിബിസി സ്റ്റുഡിയോസിനെ’ കേസിൽ നിന്ന് ഒഴിവാക്കാൻ ട്രംപ് സമ്മതിക്കുകയും ചെയ്തിരുന്നു.
