വാഷിംഗ്ടൺ : യു.എസ്. സംസ്ഥാനമായ ന്യൂ മെക്സിക്കോയുടെ പേര് മാറ്റി ‘ന്യൂ അമേരിക്ക’ . എന്നാക്കണമെന്ന ആവശ്യവുമായി അമേരിക്കൻ പ്രസിഡന്റ് ഡോണൾഡ് ട്രംപ് വീണ്ടും രംഗത്ത്. തന്റെ സോഷ്യൽ മീഡിയ പ്ലാറ്റ്‌ഫോമായ ‘ട്രൂത്ത് സോഷ്യൽ’ വഴി പങ്കുവെച്ച കുറിപ്പിലാണ് ട്രംപ് ഈ നിർദ്ദേശം മുന്നോട്ട് വെച്ചത്.തെക്കുപടിഞ്ഞാറൻ യു.എസ് സംസ്ഥാനമായ ന്യൂ മെക്സിക്കോയ്ക്ക് മെക്സിക്കോയുമായി ബന്ധിപ്പിക്കുന്ന ഒരു പേര് ഇനി ആവശ്യമില്ലെന്ന് ട്രംപ് വാദിച്ചു. “ന്യൂ മെക്സിക്കോ അതിന്റെ പേര് ഉടൻ തന്നെ ‘ന്യൂ അമേരിക്ക’ എന്ന് മാറ്റണം. നമ്മൾ മെക്സിക്കോയല്ല, യുണൈറ്റഡ് സ്റ്റേറ്റ്സ് ഓഫ് അമേരിക്കയാണ്!” ട്രംപ് കുറിച്ചു.
പേര് മാറ്റുന്നത് വഴി സംസ്ഥാനത്തിന് വലിയ സാമ്പത്തിക നേട്ടമുണ്ടാകുമെന്നും അവിടുത്തെ ജനങ്ങളുടെ അന്തസ്സും അഭിമാനവും വർദ്ധിക്കുമെന്നുമാണ് ട്രംപിന്റെ അവകാശവാദം. പുതിയ പേര് സംസ്ഥാനത്തിന് വലിയ മൂല്യവും അന്തസ്സും നൽകുമെന്നും, വീടുകളുടെ വിലയും ജനങ്ങളുടെ വരുമാനവും വർദ്ധിക്കുമെന്നും അദ്ദേഹം പറഞ്ഞു. കൂടാതെ, സംസ്ഥാനത്തെ തിരഞ്ഞെടുപ്പ് പ്രക്രിയയെ വിമർശിച്ച ട്രംപ്, പേര് മാറ്റുന്നതിലൂടെ അവിടുത്തെ തിരഞ്ഞെടുപ്പുകൾ കൂടുതൽ സുതാര്യമാകുമെന്നും ആരോപിച്ചു
കഴിഞ്ഞ സെപ്റ്റംബറിലും ട്രംപ് ഈ ആവശ്യം ഉന്നയിച്ചിരുന്നു. അന്ന് ‘മെക്സിക്കോ’ എന്ന ഭാഗം വെട്ടിമാറ്റി ‘അമേരിക്ക’ എന്ന് എഴുതിയ ഒരു ഭൂപടം അദ്ദേഹം പങ്കുവെച്ചിരുന്നു. റിപ്പബ്ലിക്കൻ സ്ഥാനാർത്ഥി ഗ്രെഗ് കണ്ണിംഗ്ഹാമിനെ പിന്തുണച്ചുകൊണ്ടുള്ള വീഡിയോയിലും “ന്യൂ മെക്സിക്കോ എന്ന് മുമ്പ് അറിയപ്പെട്ടിരുന്ന ന്യൂ അമേരിക്ക” എന്നാണ് അദ്ദേഹം സംസ്ഥാനത്തെ വിശേഷിപ്പിച്ചത്.
എന്നാൽ ന്യൂ മെക്സിക്കോയിലെ ഡെമോക്രാറ്റിക് ഗവർണറായ മിഷേൽ ലുജാൻ ഗ്രിഷാം ട്രംപിന്റെ നിർദ്ദേശം പൂർണ്ണമായി തള്ളിപ്പറഞ്ഞു. സംസ്ഥാനത്തിന്റെ പേരിന് വലിയ ചരിത്രമുണ്ടെന്നും അതിനെ ഒരു രാഷ്ട്രീയ ചർച്ചാവിഷയമാക്കരുതെന്നും അവർ വ്യക്തമാക്കി. “ന്യൂ മെക്സിക്കോയുടെ പേര് ചർച്ച ചെയ്യേണ്ട ഒന്നല്ല, അമേരിക്ക രൂപീകൃതമാകുന്നതിന് മുൻപ് തന്നെ ഈ പേര് ഞങ്ങളുടേതാണ്. സാധാരണക്കാരായ കുടുംബങ്ങൾക്ക് വേണ്ടി ആര് നിലകൊള്ളുന്നു എന്നതാണ് ഇപ്പോൾ ചർച്ച ചെയ്യേണ്ടത്,” ഗവർണർ പറഞ്ഞു. പേരുമാറ്റങ്ങളിൽ ശ്രദ്ധ കേന്ദ്രീകരിക്കുന്നതിന് പകരം തങ്ങളുടെ സർക്കാർ കുട്ടികളുടെ സംരക്ഷണം, ഉന്നത വിദ്യാഭ്യാസം, ആരോഗ്യം, ഭവനനിർമ്മാണം എന്നിവയ്ക്കാണ് മുൻഗണന നൽകുന്നതെന്നും അവർ കൂട്ടിച്ചേർത്തു.
തന്റെ രണ്ടാം ഭരണകാലത്ത് നിരവധി ഭൂമിശാസ്ത്രപരമായ പേര് മാറ്റങ്ങൾക്കാണ് ട്രംപ് ശ്രമം നടത്തുന്നത്. ഔദ്യോഗിക ആവശ്യങ്ങൾക്കായി ‘ഗൾഫ് ഓഫ് മെക്സിക്കോ’യുടെ പേര് ‘ഗൾഫ് ഓഫ് അമേരിക്ക’ എന്ന് അദ്ദേഹം മാറ്റിയിരുന്നു. ഇതിന് പിന്നാലെ അലാസ്കയിലെ ഏറ്റവും ഉയർന്ന കൊടുമുടിയായ ‘ഡെനാലി’യുടെ പേര് വീണ്ടും ‘മൗണ്ട് മക്കിൻലി’ എന്ന് പുനഃസ്ഥാപിച്ചു. കാനഡയുമായുള്ള വ്യാപാര തർക്കങ്ങൾക്കിടയിൽ ‘ലേക്ക് ഒന്റാറിയോ’യുടെ പേര് ‘ലേക്ക് അമേരിക്ക’ എന്ന് മാറ്റുമെന്നും അദ്ദേഹം പ്രഖ്യാപിച്ചിരുന്നു.
അറ്റ്ലാന്റിക്, പസഫിക് സമുദ്രങ്ങളുടെ പേര് മാറ്റുന്നതിനെക്കുറിച്ചും ട്രംപ് നേരത്തെ സൂചന നൽകിയിട്ടുണ്ട്. ഈയൊരു പേരുമാറ്റ പ്രചാരണങ്ങളുടെ തുടർച്ചയായാണ് ന്യൂ മെക്സിക്കോയെയും ലക്ഷ്യമിട്ടുള്ള ട്രംപിന്റെ പുതിയ പ്രസ്താവന. എങ്കിലും സംസ്ഥാനത്തിന്റെ പേര് മാറ്റുന്നതുമായി ബന്ധപ്പെട്ട് ഔദ്യോഗിക തീരുമാനങ്ങളൊന്നും ഇതുവരെ ഉണ്ടായിട്ടില്ല.
