വാഷിംഗ്ടൺ : നവംബറിലെ ഇടക്കാല തിരഞ്ഞെടുപ്പിന് മുൻപായി ഇറാനെതിരെ യു.എസ്. സൈനിക ആക്രമണം നടത്തിയേക്കുമെന്ന വാർത്തകൾ പുറത്തുവിട്ടവർക്കെതിരെ രൂക്ഷവിമർശനവുമായി പ്രസിഡന്റ് ഡോണൾഡ് ട്രംപ്. വിവരങ്ങൾ ചോർത്തുന്നവരെ വെടിവെച്ചുകൊല്ലണമെന്നാണ് തന്റെ വ്യക്തിപരമായ അഭിപ്രായമെന്ന് ട്രംപ് പരസ്യമായി പ്രസ്താവിച്ചു.
അരിസോണയിലെ ബുൾഹെഡ് സിറ്റിയിൽ നടന്ന തിരഞ്ഞെടുപ്പ് പ്രചാരണ റാലിയിലാണ് ട്രംപിന്റെ വിവാദ പരാമർശം. “പണ്ടുകാലത്ത് വിവരങ്ങൾ ചോർത്തുന്നവരെ നമ്മൾ വെടിവെച്ചുകൊല്ലുമായിരുന്നു. ഒരു രാജ്യം എപ്പോൾ ആക്രമിക്കാൻ പോകുന്നു എന്നതുപോലുള്ള അതീവ രഹസ്യ വിവരങ്ങളാണ് ഇവർ ചോർത്തുന്നത്. ദശലക്ഷക്കണക്കിന് ആളുകളെ ഒറ്റയടിക്ക് ഇല്ലാതാക്കാൻ ശേഷിയുള്ള മാരകായുധങ്ങൾ ശത്രുക്കളുടെ കൈകളിൽ എത്താതിരിക്കാനുള്ള പ്രതിരോധത്തിന്റെ ഭാഗമായാണ് ഇത്തരം ആക്രമണങ്ങൾ ആസൂത്രണം ചെയ്യുന്നത്,” ട്രംപ് വ്യക്തമാക്കി.
വിവരങ്ങൾ ചോർത്തുന്നവരെ വളരെ ശക്തമായി തന്നെ കൈകാര്യം ചെയ്യണമെന്നും, തന്നെ സംബന്ധിച്ചിടത്തോളം അവർ ഭൂമിയിലെ ഏറ്റവും വലിപ്പകെട്ടവരാണെന്നും ട്രംപ് കൂട്ടിച്ചേർത്തു.ഇറാനിയൻ ലക്ഷ്യങ്ങൾക്കെതിരെ ആക്രമണം നടത്തുന്നതിനുള്ള സാധ്യതകൾ പെന്റഗൺ പരിശോധിക്കുന്നുണ്ടെന്ന് ഒക്ടോബർ 7-ന് പ്രമുഖ അന്താരാഷ്ട്ര മാധ്യമമായ ‘ദി അറ്റ്ലാന്റിക്’ റിപ്പോർട്ട് ചെയ്തിരുന്നു. എന്നാൽ ഇതിൽ അന്തിമ തീരുമാനങ്ങളൊന്നും എടുത്തിരുന്നില്ല. ഈ റിപ്പോർട്ടുകൾ പുറത്തുവന്നതിന് പിന്നാലെ, നവംബർ 3-ന് നടക്കുന്ന ഇടക്കാല തിരഞ്ഞെടുപ്പിന് മുൻപ് യു.എസ്. ഇറാനെ ആക്രമിക്കില്ലെന്ന് ട്രൂത്ത് സോഷ്യൽ പ്ലാറ്റ്‌ഫോമിലൂടെ ട്രംപ് ഔദ്യോഗികമായി അറിയിച്ചിരുന്നു.
