വാഷിംഗ്ടൺ : ലോകാരോഗ്യ സംഘടനയിലെ (WHO) യു.എസ് അംഗത്വം റദ്ദാക്കിക്കൊണ്ടുള്ള എക്സിക്യൂട്ടീവ് ഉത്തരവിൽ ഒപ്പുവെച്ച് ആഴ്ചകൾക്ക് ശേഷം, സംഘടനയിൽ തുടർന്നും അംഗമായിരിക്കുന്നതിനായി കടുത്ത നിബന്ധനകളുമായി വൈറ്റ് ഹൗസ് പുതിയ പദ്ധതി തയ്യാറാക്കുന്നു. ഐക്യരാഷ്ട്രസഭയുടെ കീഴിലുള്ള ഈ ആഗോള ആരോഗ്യ ഏജൻസിയുടെ ചരിത്രത്തിലാദ്യമായി ഒരു അമേരിക്കക്കാരനെ തലപ്പത്ത് നിയമിക്കണമെന്നതും, സംഘടനയ്ക്കുള്ളിൽ വൻ പരിഷ്കാരങ്ങൾ വരുത്തണമെന്നതുമാണ് അമേരിക്കയുടെ പ്രധാന ആവശ്യങ്ങൾ.
ലോകാരോഗ്യ സംഘടനയിലെ അപാകതകൾ പരിഹരിച്ച് “ശുദ്ധീകരിക്കുകയാണെങ്കിൽ” അമേരിക്കയ്ക്ക് സംഘടനയിൽ തിരിച്ചെത്താനാകുമെന്ന് പ്രസിഡന്റ് ഡോണൾഡ് ട്രംപ് സൂചിപ്പിച്ചു. എന്നാൽ ഇതിനായി എന്തൊക്കെ നിർദ്ദിഷ്ട മാറ്റങ്ങളാണ് വരുത്തേണ്ടതെന്ന കാര്യത്തിൽ വൈറ്റ് ഹൗസ് വ്യക്തത നൽകിയിട്ടില്ല. ട്രംപ് അധികാരമേറ്റ ഉടൻ എടുത്ത ആദ്യത്തെ നയപരമായ തീരുമാനങ്ങളിലൊന്നായിരുന്നു ലോകാരോഗ്യ സംഘടനയിൽ നിന്ന് പുറത്തുപോകാനുള്ള ഉത്തരവ്. കോവിഡ്-19 മഹാമാരി കൈകാര്യം ചെയ്യുന്നതിൽ സംഘടന പരാജയപ്പെട്ടുവെന്നും മറ്റ് രാജ്യങ്ങൾ ഇതിനെ അനാവശ്യമായി സ്വാധീനിക്കുന്നുണ്ടെന്നുമാണ് അമേരിക്കയുടെ പ്രധാന ആരോപണം. എന്നാൽ ലോകാരോഗ്യ സംഘടന ഈ ആരോപണങ്ങൾ നിഷേധിച്ചിട്ടുണ്ട്.
അധികാരക്കൈമാറ്റ ടീമിന്റെ അഭ്യർത്ഥനപ്രകാരം പുറത്തുനിന്നുള്ള ഒരു പോളിസി വിദഗ്ദ്ധൻ തയ്യാറാക്കിയ ഔദ്യോഗിക രേഖകൾ ഉദ്ധരിച്ച് റോയിട്ടേഴ്സ് ആണ് ഈ വാർത്ത പുറത്തുവിട്ടത്. ഐക്യരാഷ്ട്രസഭയുടെ കീഴിലുള്ള “ഏറ്റവും അരാജകത്വമുള്ളതും കാര്യക്ഷമതയില്ലാത്തതുമായ ഏജൻസി”യായി ലോകാരോഗ്യ സംഘടന മാറിയെന്നാണ് ഈ റിപ്പോർട്ടിലെ നിഗമനം. കഴിഞ്ഞ രണ്ട് പതിറ്റാണ്ടുകളായി നിർദ്ദേശിക്കപ്പെട്ട പരിഷ്കാരങ്ങൾ നടപ്പിലാക്കുന്നതിൽ സംഘടന പരാജയപ്പെട്ടുവെന്നും ഇത് മാനേജ്മെന്റിന്റെയും ശാസ്ത്രീയ വൈദഗ്ധ്യത്തിന്റെയും തകർച്ചയ്ക്ക് കാരണമായെന്നും റിപ്പോർട്ട് കുറ്റപ്പെടുത്തുന്നു.
സംഘടനയിൽ നിന്ന് വിട്ടുപോകുന്നത് അമേരിക്കയുടെ താൽപ്പര്യങ്ങളെ ബാധിക്കുമെങ്കിലും, പരിഷ്കാരങ്ങൾ വരുത്താതെയുള്ള തുടർച്ചയും സമാനമായ അവസ്ഥയുണ്ടാക്കുമെന്നാണ് യു.എസ് വിലയിരുത്തൽ. അടുത്ത വർഷം നിശ്ചയിച്ചിട്ടുള്ള പിന്മാറ്റത്തിന് മുന്നോടിയായി, ലോകാരോഗ്യ സംഘടനയുമായുള്ള പരിഷ്കരണ ചർച്ചകൾക്ക് മേൽനോട്ടം വഹിക്കാൻ 2025-ൽ ട്രംപിനും വൈറ്റ് ഹൗസിനും നേരിട്ട് റിപ്പോർട്ട് ചെയ്യുന്ന ഒരു യു.എസ് പ്രത്യേക പ്രതിനിധിയെ നിയമിക്കാനും പ്രൊപ്പോസലിൽ ശുപാർശയുണ്ട്.നിലവിൽ സ്റ്റേറ്റ് ഡിപ്പാർട്ട്‌മെന്റും ഹെൽത്ത് ആൻഡ് ഹ്യൂമൻ സർവീസസ് ഡിപ്പാർട്ട്‌മെന്റുമാണ് ലോകാരോഗ്യ സംഘടനയുമായുള്ള ഏകോപനം കൈകാര്യം ചെയ്യുന്നത്. പുതിയ പ്രത്യേക പ്രതിനിധി വരുന്നതോടെ ഒരു യു.എസ് ഉദ്യോഗസ്ഥനെ ലോകാരോഗ്യ സംഘടനയുടെ തലപ്പത്ത് എത്തിക്കാൻ കടുത്ത സമ്മർദ്ദമുണ്ടാകും. ലോകാരോഗ്യ സംഘടനയുടെ നേതൃത്വത്തിൽ അമേരിക്കക്കാരൻ ഇല്ലാത്തതാണ് അമേരിക്കൻ ഫണ്ടുകൾ പാഴാകാനും സംഘടനയുടെ കാര്യക്ഷമത കുറയാനും പ്രധാന കാരണമെന്നും പ്രൊപ്പോസലിൽ വ്യക്തമാക്കുന്നു.
ലോകാരോഗ്യ സംഘടനയ്ക്ക് പ്രതിവർഷം മൊത്തം ഫണ്ടിന്റെ 18% നൽകുന്ന ഏറ്റവും വലിയ സാമ്പത്തിക പങ്കാളിയാണ് അമേരിക്ക. ഇതിൽ 400 ദശലക്ഷം ഡോളർ സന്നദ്ധ സംഭാവനയായും, 130 ദശലക്ഷം ഡോളർ നിർബന്ധിത വിഹിതവുമായാണ് നൽകുന്നത്. അമേരിക്കൻ ഫണ്ടിന്റെ കുറവ് നികത്താൻ മറ്റ് ദാതാക്കൾ മുന്നോട്ടുവന്നില്ലെങ്കിൽ ലോകാരോഗ്യ സംഘടനയ്ക്ക് കടുത്ത ചെലവ് ചുരുക്കൽ നടപടികളിലേക്ക് കടക്കേണ്ടി വരും.
