നഗോയ : ഐച്ചി നഗോയ ഏഷ്യൻ ഗെയിംസിന്റെ 11-ാം ദിനത്തിൽ ഇന്ത്യയ്ക്ക് മികച്ച തുടക്കം. അമ്പെയ്ത്തിൽ വനിതകളുടെ കോമ്പൗണ്ട് ടീം സ്വർണമണിഞ്ഞു. ഫൈനലിൽ ഒന്നാം സീഡുകളായ ചൈനയെ തകർത്ത് തങ്ങളുടെ ഏഷ്യൻ ഗെയിംസ് ചാമ്പ്യൻപട്ടം നിലനിർത്താൻ ഇന്ത്യൻ ടീമിന് സാധിച്ചു. ജ്യോതി സുരേഖ വെന്നം, പ്രീതിക പ്രദീപ്, തനിപർത്തി ചികിത എന്നിവരടങ്ങിയ ടീമാണ് ഇത്തവണത്തെ ഗെയിംസിലെ ഇന്ത്യയുടെ ഏഴാം സ്വർണ മെഡൽ സ്വന്തമാക്കിയത്.
ഫൈനലിൽ ദക്ഷിണ കൊറിയ കുറിച്ച ലോക റെക്കോർഡിനൊപ്പമെത്താനും ഇന്ത്യൻ സംഘത്തിന് കഴിഞ്ഞു. സമ്മർദ ഘട്ടങ്ങളിലും തികഞ്ഞ ശ്രദ്ധയോടെയും ആത്മവിശ്വാസത്തോടെയും മത്സരിച്ച ഇന്ത്യൻ താരങ്ങൾ മത്സരത്തിലുടനീളം വ്യക്തമായ മേധാവിത്വം പുലർത്തി. നാലാം എൻഡിന്റെ ആദ്യ റൊട്ടേഷനിൽ ചൈന 10, 9, 9 എന്നിങ്ങനെ സ്കോർ ചെയ്തപ്പോൾ, ഇന്ത്യ തികഞ്ഞ കൃത്യതയോടെ 10, 10, 10 സ്കോർ ചെയ്താണ് തിരിച്ചടിച്ചത്. രണ്ടാമത്തെ റൊട്ടേഷനിൽ ചൈന 30/30 നേട്ടവുമായി തിരിച്ചുവരാൻ ശ്രമിച്ചെങ്കിലും, നേരത്തെ തന്നെ വലിയ ലീഡ് സ്വന്തമാക്കിയ ഇന്ത്യൻ ടീം വീണ്ടും 10, 10, 10 സ്കോർ ചെയ്ത് സ്വർണ്ണമെഡൽ ഉറപ്പിച്ചു.
