ടെഹ്റാൻ : തങ്ങൾക്കെതിരെ കരയുദ്ധത്തിന് മുതിർന്നാൽ പേർഷ്യൻ ഉൾക്കടലിൽ വ്യാപകമായി മൈനുകൾ വിതയ്ക്കുമെന്ന് ഇറാൻ മുന്നറിയിപ്പ് നൽകി. ഇറാൻ്റെ ഭീഷണി യാഥാർത്ഥ്യമായാൽ ലോകത്തെ ഏറ്റവും പ്രധാനപ്പെട്ട കപ്പൽപ്പാതകളിലൊന്നായ ഹോർമുസ് കടലിടുക്ക് വഴിയുള്ള ചരക്കുനീക്കം പൂർണ്ണമായും നിലയ്ക്കുന്ന സാഹചര്യമുണ്ടാകും.
ലോകത്തെ എണ്ണക്കടത്തിൻ്റെ വലിയൊരു ഭാഗം നടക്കുന്നത് ഹോർമുസ് വഴിയായതിനാൽ, ഇറാൻ്റെ നീക്കം ആഗോള എണ്ണവിപണിയെയും സാമ്പത്തികരംഗത്തെയും തകിടം മറിക്കുമെന്നാണ് ആശങ്ക. അതേസമയം, ഇറാനുമായി നിലവിൽ കരയുദ്ധത്തിന് പദ്ധതിയൊന്നുമില്ലെന്ന് അമേരിക്കൻ പ്രസിഡൻ്റ് ഡോണൾഡ് ട്രംപ് വ്യക്തമാക്കിയിട്ടുണ്ട്. മേഖലയിൽ സംഘർഷം ലഘൂകരിക്കാനാണ് താല്പര്യമെന്ന സൂചനയാണ് ട്രംപിൻ്റെ വാക്കുകൾ നൽകുന്നത്. എങ്കിലും ഇറാനുമേൽ ഏർപ്പെടുത്തിയിരിക്കുന്ന കർശനമായ സാമ്പത്തിക ഉപരോധങ്ങളുമായി മുന്നോട്ട് പോകാനാണ് അമേരിക്കയുടെ തീരുമാനം.
ഹോർമുസ് കടലിടുക്ക് വഴിയുള്ള ചരക്കുനീക്കം തടസ്സപ്പെട്ടാൽ അന്താരാഷ്ട്ര വിപണിയിൽ എണ്ണവില കുതിച്ചുയരാൻ സാധ്യതയുണ്ട്. ഇത് ഇന്ത്യയുൾപ്പെടെയുള്ള ഇറക്കുമതി രാജ്യങ്ങളുടെ സമ്പദ്വ്യവസ്ഥയെ സാരമായി ബാധിക്കുമെന്നതിനാൽ അതീവ ജാഗ്രതയോടെയാണ് ലോകരാഷ്ട്രങ്ങൾ ഈ നീക്കങ്ങളെ നോക്കിക്കാണുന്നത്.
മേഖലയിൽ സമാധാനം നിലനിർത്താൻ ഐക്യരാഷ്ട്രസഭയും വിവിധ യൂറോപ്യൻ രാജ്യങ്ങളും ഇടപെടലുകൾ നടത്തുന്നുണ്ടെങ്കിലും, ഇരുരാജ്യങ്ങളും തമ്മിലുള്ള വാക്പോര് തുടരുന്നത് ആശങ്ക വർദ്ധിപ്പിക്കുകയാണ്. ഉപരോധങ്ങൾ പിൻവലിക്കാതെ ചർച്ചകൾക്കില്ലെന്ന ഉറച്ച നിലപാടിലാണ് ഇറാൻ ഭരണകൂടം. ഇറാന്റെ ഭാഗത്തുനിന്നുള്ള ഭീഷണിയെത്തുടർന്ന് പേർഷ്യൻ ഉൾക്കടലിൽ അമേരിക്കയും സഖ്യകക്ഷികളും നിരീക്ഷണം ശക്തമാക്കിയിട്ടുണ്ട്. ഏതെങ്കിലും തരത്തിലുള്ള പ്രകോപനമുണ്ടായാൽ ശക്തമായി തിരിച്ചടിക്കുമെന്ന് അമേരിക്കൻ പ്രതിരോധ കേന്ദ്രങ്ങൾ നേരത്തെ മുന്നറിയിപ്പ് നൽകിയിരുന്നു.
