ഡൽഹി സ്ഫോടനക്കേസിൽ ഗൂഢാലോചന നടത്തിയവർക്ക് തക്കതായ മറുപടി നൽകുമെന്നും ഉത്തരവാദികളെ വെറുതെ വിടില്ലെന്നും പ്രധാനമന്ത്രി നരേന്ദ്രമോദി. ഹൃദയവേദനയോടെയാണ് ഭൂട്ടാനിലെത്തിയതെന്നും ഗൂഢാലോചന നടത്തിയവരെ കണ്ടെത്തുമെന്നും പ്രധാനമന്ത്രി പറഞ്ഞു. ഡൽഹി സ്ഫോടനത്തിന്റെ ഇരകളായ കുടുംബങ്ങളുടെ വേദന തനിക്ക് മനസിലാകും. രാജ്യം മുഴുവൻ അവരോടൊപ്പമുണ്ട്. സംഭവത്തെക്കുറിച്ച് അന്വേഷിക്കുന്ന എല്ലാ ഏജൻസികളുമായും ഇന്നലെ രാത്രി മുഴുവൻ ബന്ധപ്പെട്ടിരുന്നുവെന്നും പ്രധാനമന്ത്രി പറഞ്ഞു.
അതേസമയം, സ്ഫോടനത്തിന് ഉത്തരവാദികളായവരെ വെറുതെ വിടില്ലെന്ന് പ്രതിരോധമന്ത്രി രാജ്നാഥ് സിങും പറഞ്ഞു. മനോഹര് പരീഖര് ഇന്സ്റ്റിറ്റ്യൂട്ട് ഫോര് ഡിഫന്സ് സ്റ്റഡീസ് ആന്ഡ് അനാലിസിസ് സംഘടിപ്പിച്ച ഡല്ഹി ഡിഫന്സ് ഡയലോഗില് പങ്കെടുത്ത് സംസാരിക്കുകയായിരുന്നു അദ്ദേഹം. സ്ഫോടനത്തിൻ്റെ ഉത്തരവാദികൾ കഠിനമായ ശിക്ഷ നേരിടേണ്ടി വരുമെന്നും സര്ക്കാര് അതീവ ഗൗരവത്തോടെയാണ് ഈ സംഭവം കാണുന്നതെന്നും അദ്ദേഹം പറഞ്ഞു.
ദുരന്തത്തിന് ഉത്തരവാദികളായവരെ നിയമത്തിന് മുന്നില് കൊണ്ടുവരും. ഒരു സാഹചര്യത്തിലും അവരെ വെറുതെ വിടില്ലെന്ന് രാജ്യത്തിന് ഉറപ്പ് നല്കുന്നു. രാജ്യത്തെ മുന്നിര അന്വേഷണ ഏജന്സികള് സംഭവത്തെക്കുറിച്ച് വേഗത്തിലും സമഗ്രമവുമായ അന്വേഷണം നടത്തുന്നുണ്ടെന്ന് ഈ അവസരത്തില് ഉറപ്പ് നല്കുന്നുവെന്നും അദ്ദേഹം കൂട്ടിച്ചേർത്തു.
അതേസമയം ഡല്ഹി ചെങ്കോട്ടയ്ക്ക് സമീപമുണ്ടായ സ്ഫോടനത്തിന് പിന്നില് പ്രവര്ത്തിച്ചവരുമായി ബന്ധപ്പെട്ട കൂടുതല് വിവരങ്ങള് പുറത്ത് വരികയാണ്. ജെയ്ഷെ ഭീകരനും പുല്വാമ കോലി സ്വദേശിയുമായ ഉമര് മുഹമ്മദിൻ്റെ വിവരങ്ങളാണ് പുറത്തു വരുന്നത്. ഫരീദാബാദിലെ അല് ഫലാഹ് സര്വകലാശാലയില് അസിസ്റ്റന്റ് പ്രൊഫസറായ ഉമറാണ് ആമിറിന്റെ പേരില് കഴിഞ്ഞ മാസം വാങ്ങിയ കാറിനു മുഴുവന് പണവും നല്കിയത്.
