ചങ്ങനാശ്ശേരി : ആഗോള അയ്യപ്പ സംഗമത്തിന് നൽകിയ ഇടത് പിന്തുണയിൽ യാതൊരു മാറ്റവുമില്ലെന്ന് നായർ സർവീസ് സൊസൈറ്റി (എൻ എസ് എസ്) ജനറൽ സെക്രട്ടറി ജി സുകുമാരൻ നായർ വ്യക്തമാക്കി. ശബരിമലയിലെ വികസനത്തിനായാണ് അയ്യപ്പ സംഗമത്തെ അനുകൂലിച്ചതെന്നും, എന്നാൽ മാധ്യമങ്ങൾ വിഷയം രാഷ്ട്രീയവൽക്കരിച്ച് വഷളാക്കിയെന്നും അദ്ദേഹം വിമർശിച്ചു.
എൻ എസ് എസ് രാഷ്ട്രീയമായി സമദൂരം പാലിക്കുന്ന നിലപാടിൽ ഉറച്ചുനിൽക്കുമെന്നും, വിശ്വാസവും ആചാരവും സംരക്ഷിക്കുകയാണ് തങ്ങളുടെ ലക്ഷ്യമെന്നും സുകുമാരൻ നായർ ചങ്ങനാശ്ശേരിയിൽ നടന്ന വിജയദശമി ദിന പരിപാടിയിൽ പറഞ്ഞു. എൻഎസ്എസിനെ കമ്മ്യൂണിസ്റ്റും കോൺഗ്രസും ബിജെപിയും ആക്കാൻ ആരും ശ്രമിക്കരുതെന്നും അദ്ദേഹം കൂട്ടിച്ചേർത്തു.
ശബരിമലയിലെ ആചാരങ്ങളും അനുഷ്ഠാനങ്ങളും ദേവസ്വം ബോർഡ് സംരക്ഷിക്കുന്നുണ്ടെന്നും, എൻ എസ് എസിന്റെ നിലപാട് ശബരിമല വിഷയത്തിൽ സുപ്രീം കോടതിയിലെ 9 അംഗ ബഞ്ചിൽ തുടരുന്ന കേസിലും പ്രകടമാണെന്നും അദ്ദേഹം വിശദീകരിച്ചു. കേന്ദ്ര-സംസ്ഥാന സർക്കാരുകളുടെ അംഗീകാരം എൻ എസ് എസിന് ആവശ്യമില്ലെന്നും, മന്നം പത്മനാഭൻ സ്ഥാപിച്ച അടിത്തറ ഉറച്ചതാണെന്നും അദ്ദേഹം ഊന്നിപ്പറഞ്ഞു. എൻ എസ് എസിനെ വ്യക്തിഹത്യയിലൂടെ തകർക്കാൻ ആർക്കും കഴിയില്ലെന്നും, മാന്യമായി പ്രവർത്തിക്കുന്ന ഈ പ്രസ്ഥാനത്തെ ലാഭേച്ഛയ്ക്കായി നശിപ്പിക്കാൻ ശ്രമിക്കുന്നത് വിജയിക്കില്ലെന്നും അദ്ദേഹം കൂട്ടിച്ചേർത്തു.
മാധ്യമങ്ങളുടെ ഒരു വിഭാഗം വിഷയം വഷളാക്കാൻ ശ്രമിക്കുന്നതിന് പിന്നിൽ ചിലരുടെ ഇടപെടലുണ്ടെന്ന് സുകുമാരൻ നായർ ആരോപിച്ചു. എൻ എസ് എസ് രാഷ്ട്രീയ പാർട്ടികളായ കമ്മ്യൂണിസ്റ്റ്, കോൺഗ്രസ്, ബിജെപി എന്നിവയിൽനിന്ന് തുല്യദൂരം പാലിക്കുമെന്ന് അദ്ദേഹം ആവർത്തിച്ചു. ശബരിമലയുടെ വികസനത്തിനായി അയ്യപ്പ സംഗമത്തിൽ പങ്കെടുത്തെങ്കിലും, അതിനെ രാഷ്ട്രീയവൽക്കരിക്കാനുള്ള ശ്രമങ്ങൾ അംഗീകരിക്കാനാവില്ലെന്നും അദ്ദേഹം വ്യക്തമാക്കി.
