വാഷിംഗ്ടൺ : യുണൈറ്റഡ് സ്റ്റേറ്റ്സ് സിറ്റിസൺഷിപ്പ് ആൻഡ് ഇമിഗ്രേഷൻ സർവീസസ് ഗ്രീൻ കാർഡ് അപേക്ഷകർക്കായുള്ള ‘പബ്ലിക് ചാർജ്’ നിയമങ്ങളിൽ നിർണ്ണായക ഭേദഗതികൾ വരുത്തി. ഈ മാസം മുതൽ പുതിയ മാർഗ്ഗനിർദ്ദേശങ്ങൾ ഔദ്യോഗികമായി പ്രാബല്യത്തിൽ വന്നു. പുതിയ പരിഷ്കാരങ്ങൾ പ്രകാരം ഭൂരിഭാഗം ഗ്രീൻ കാർഡ് അപേക്ഷകരും തങ്ങൾക്ക് യു.എസിൽ ജീവിക്കാൻ ആവശ്യമായ സാമ്പത്തിക സ്വയംപര്യാപ്തതയുണ്ടെന്ന് കർശനമായി തെളിയിക്കേണ്ടതുണ്ട്.
അതേസമയം, അഭയാർത്ഥികൾ ഉൾപ്പെടെയുള്ള മാനുഷിക പരിഗണന അർഹിക്കുന്ന വിഭാഗങ്ങൾക്ക് പുതിയ നിയമത്തിൽ ഇളവ് അനുവദിച്ചിട്ടുണ്ട്.കുടുംബം, തൊഴിൽ എന്നിവ അടിസ്ഥാനമാക്കി സ്ഥിരതാമസ വിസയ്ക്ക് അപേക്ഷിക്കുന്ന ഭൂരിഭാഗം പ്രവാസികളെയും പുതിയ നിയമം നേരിട്ട് ബാധിക്കും. യു.എസ് പൗരന്മാരുടെയും നിയമപരമായ സ്ഥിരതാമസക്കാരുടെയും (LPR) പങ്കാളികൾ, കുട്ടികൾ, മാതാപിതാക്കൾ തുടങ്ങിയ അടുത്ത ബന്ധുക്കൾ, പ്രതിശ്രുത വരൻ/വധു, തൊഴിലധിഷ്ഠിത കാറ്റഗറിയിൽ വരുന്ന പ്രയോറിറ്റി വർക്കർമാർ, ഉന്നത ബിരുദമുള്ള പ്രൊഫഷണലുകൾ, വിദഗ്ദ്ധ-പൊതു തൊഴിലാളികൾ, നിക്ഷേപകർ, മതവിശ്വാസവുമായി ബന്ധപ്പെട്ട് പ്രവർത്തിക്കുന്നവർ, ഡൈവേഴ്സിറ്റി വിസ ഇമിഗ്രന്റുകൾ എന്നിവർ പുതിയ പബ്ലിക് ചാർജ് പരിശോധനയ്ക്ക് വിധേയരാകണം. കുട്ടികളെ ഈ നിബന്ധനയിൽ നിന്ന് ഒഴിവാക്കിയിട്ടില്ലെന്ന് യു.എസ്.സി.ഐ.എസ് പ്രത്യേകം വ്യക്തമാക്കിയിട്ടുണ്ട്.
അഭയാർത്ഥികൾ, അഭയം തേടിയവർ, മനുഷ്യക്കടത്തിനും മറ്റ് കുറ്റകൃത്യങ്ങൾക്കും ഇരയായി ടി, യു വിസകളിൽ കഴിയുന്നവർ, VAWA അതിജീവിച്ചവർ, യു.എസ് ഗവൺമെന്റിന് കീഴിൽ ജോലി ചെയ്ത അഫ്ഗാൻ-ഇറാഖ് പൗരന്മാർ, ചില പ്രത്യേക നയതന്ത്രജ്ഞർ എന്നിവരെ പുതിയ സാമ്പത്തിക പരിശോധനകളിൽ നിന്ന് പൂർണ്ണമായി ഒഴിവാക്കിയിട്ടുണ്ട്.സ്പോൺസർമാർ സമർപ്പിക്കുന്ന ഫോം I-864 ഇനിയും പ്രധാന ഘടകമായി തുടരുമെങ്കിലും, ഇത് സമർപ്പിച്ചു എന്നതുകൊണ്ട് മാത്രം അപേക്ഷ സ്വയമേവ അംഗീകരിക്കപ്പെടില്ല. സ്പോൺസർക്ക് അപേക്ഷകനെ സാമ്പത്തികമായി സംരക്ഷിക്കാൻ യഥാർത്ഥ ശേഷിയുണ്ടോ എന്ന് ഉദ്യോഗസ്ഥർ പ്രത്യേകം പരിശോധിക്കും. എന്നാൽ താൽക്കാലിക തൊഴിലില്ലായ്മയോ വൈകല്യമോ പ്രായക്കൂടുതലോ ഉള്ളവർക്ക് മറ്റ് ആരോഗ്യപ്രശ്നങ്ങൾ ഇല്ലെങ്കിൽ അത് അയോഗ്യതയായി കണക്കാക്കില്ല.
അപേക്ഷകൾ എന്നാണ് സമർപ്പിച്ചത് എന്നതിനെ അടിസ്ഥാനമാക്കിയായിരിക്കും പുതിയ നിയമങ്ങൾ ബാധകമാവുക. 2026 സെപ്റ്റംബർ 18-നോ അതിനുശേഷമോ സമർപ്പിച്ച അപേക്ഷകൾക്കാണ് ഈ കർശനമായ പുതിയ ഗൈഡൻസ് ബാധകമാകുന്നത്. അതിനുമുമ്പ് (2022 ഡിസംബർ 23 മുതൽ 2026 സെപ്റ്റംബർ 17 വരെ) ഫയൽ ചെയ്ത അപേക്ഷകളിൽ പഴയ 2022-ലെ ഫൈനൽ റൂൾ മാത്രമായിരിക്കും ബാധകമാവുക.അപേക്ഷ പൂർണ്ണമായി നിരസിക്കപ്പെടുന്നതിന് മുൻപായി, തങ്ങൾക്ക് സാമ്പത്തിക ബാധ്യതയില്ലെന്ന് ഉറപ്പുവരുത്താൻ ഫോം I-945 വഴി ‘പബ്ലിക് ചാർജ് ബോണ്ട്’ തുക കെട്ടിവെക്കാനുള്ള പ്രത്യേക വിവേചനാധികാരവും ഇമിഗ്രേഷൻ വകുപ്പ് ഉദ്യോഗസ്ഥർക്ക് നൽകിയിട്ടുണ്ട്.
