വാഷിംഗ്ടൺ : ടെക്സാസിലെ ഫോർട്ട് ഹൂഡിലുണ്ടായ മാരകമായ ഹെലികോപ്റ്റർ അപകടത്തെത്തുടർന്ന് യു.എസ് സൈന്യം താൽക്കാലികമായി എല്ലാ അപ്പാച്ചെ ഹെലികോപ്റ്ററുകളുടെയും സർവീസുകൾ നിർത്തിവെച്ചു. വെള്ളിയാഴ്ചയാണ് സൈനിക മേധാവികൾ ഇത് സംബന്ധിച്ച അടിയന്തര ഉത്തരവിറക്കിയത്. അപകടത്തിൻ്റെ കൃത്യമായ കാരണം കണ്ടെത്തുന്നതുവരെ ‘എ.എച്ച്-64 അപ്പാച്ചെ’ ഹെലികോപ്റ്ററുകളുടെ പരിശീലന പറക്കലുകൾ നിർത്തിവെക്കാനാണ് നിർദ്ദേശം.
കഴിഞ്ഞ ബുധനാഴ്ച പതിവ് അറ്റകുറ്റപ്പണികൾക്ക് ശേഷമുള്ള പരീക്ഷണ പറക്കലിനിടെയാണ് അപകടമുണ്ടായത്. ഇരുവർക്കും സഞ്ചരിക്കാവുന്ന അറ്റാക്ക് ഹെലികോപ്റ്റർ തകർന്നുവീണ് ചീഫ് വാറൻ്റ് ഓഫീസർ ഡിയോൺട്രെ ടി. ഹ്യൂ (34), വാറൻ്റ് ഓഫീസർ സെത്ത് എൽ. ഓംസ്റ്റഡ് (25) എന്നീ രണ്ട് യു.എസ് സൈനികർ സംഭവസ്ഥലത്തുതന്നെ മരണപ്പെട്ടിരുന്നു. സമീപകാലത്തെ കണക്കുകൾ പ്രകാരം യു.എസ് സൈന്യത്തിൻ്റെ പക്കലുള്ള മറ്റ് ഹെലികോപ്റ്ററുകളെ അപേക്ഷിച്ച് അപ്പാച്ചെ വിഭാഗത്തിൽപ്പെട്ട വിമാനങ്ങൾക്കാണ് കൂടുതൽ അപകടങ്ങൾ സംഭവിച്ചിട്ടുള്ളത് എന്നത് വലിയ സുരക്ഷാ ആശങ്കകൾക്ക് കാരണമാകുന്നുണ്ട്.
ഇന്ത്യൻ സേനയിലും അപ്പാച്ചെ സാന്നിധ്യം അമേരിക്കൻ സൈന്യത്തിൻ്റെ ഈ അടിയന്തര നടപടി ഇന്ത്യൻ പ്രതിരോധ മേഖലയിലും ശ്രദ്ധ നേടുകയാണ്. നിലവിൽ ഇന്ത്യൻ വ്യോമസേനയും ഇന്ത്യൻ കരസേനയും അത്യാധുനിക അപ്പാച്ചെ ഹെലികോപ്റ്ററുകൾ ഉപയോഗിക്കുന്നുണ്ട്. ഇന്ത്യൻ വ്യോമസേന 2015-ൽ ഒപ്പുവെച്ച കരാറിൻ്റെ അടിസ്ഥാനത്തിൽ വാങ്ങിയ 22 അപ്പാച്ചെ ഹെലികോപ്റ്ററുകളാണ് നിലവിൽ വ്യോമസേനയുടെ പക്കലുള്ളത്.
ഇന്ത്യൻ കരസേന 2020 ഫെബ്രുവരിയിൽ ഒപ്പുവെച്ച കരാർ പ്രകാരം 6 അപ്പാച്ചെ ഹെലികോപ്റ്ററുകൾക്ക് കരസേന ഓർഡർ നൽകിയിരുന്നു. ഈ ഓർഡറിൻ്റെ അവസാന ബാച്ച് ഹെലികോപ്റ്ററുകൾ 2025 ഡിസംബറിലാണ് ഇന്ത്യയ്ക്ക് വിജയകരമായി കൈമാറിയത്. ജോധ്പൂർ ആസ്ഥാനമായുള്ള ആർമി ഏവിയേഷൻ സ്ക്വാഡ്രൻ്റെ ഭാഗമായാണ് ഇവ പ്രവർത്തിക്കുന്നത്.യു.എസ് സൈന്യത്തിൻ്റെ പക്കലുള്ള അപ്പാച്ചെ ഹെലികോപ്റ്ററുകൾക്ക് അപകടസാധ്യത കൂടിയതായി അന്വേഷണ സംഘങ്ങൾ വിലയിരുത്തുന്ന പശ്ചാത്തലത്തിൽ, ഇന്ത്യൻ സൈന്യവും ഈ സുരക്ഷാ അന്വേഷണത്തെ അതീവ ഗൗരവത്തോടെയാണ് വീക്ഷിക്കുന്നത്.
