ടെഹ്റാൻ : ഇറാൻ കീഴടങ്ങണമെന്നും രാജ്യത്തിൻ്റെ അടുത്ത പരമോന്നത നേതാവിനെ തീരുമാനിക്കുന്നതിൽ അമേരിക്കയ്ക്ക് പങ്കുണ്ടാകുമെന്നുമുള്ള പ്രസിഡൻ്റ് ഡോണൾഡ് ട്രംപിൻ്റെ പ്രസ്താവനകളെ ശക്തമായി തള്ളി ഇറാൻ. ട്രംപിൻ്റെ അവകാശവാദങ്ങൾ വെറും പരിഹാസ്യമാണെന്നും വാഷിംഗ്ടണിൻ്റെ ഇത്തരം സമ്മർദ്ദ തന്ത്രങ്ങൾക്ക് വഴങ്ങില്ലെന്നും ഇറാൻ ഭരണകൂടം വ്യക്തമാക്കി. സെൻ്റർ ഫോർ മിഡിൽ ഈസ്റ്റ് സ്ട്രാറ്റജിക് സ്റ്റഡീസിലെ അബ്ബാസ് അസ്ലാനിയെ ഉദ്ധരിച്ച് അൽ ജസീറയാണ് ഈ വാർത്ത റിപ്പോർട്ട് ചെയ്തത്.
ഇറാൻ്റെ അടുത്ത പരമോന്നത നേതാവിനെ തിരഞ്ഞെടുക്കുന്നത് രാജ്യത്തെ ഭരണഘടനാ സ്ഥാപനമായ ‘അസംബ്ലി ഓഫ് എക്സ്പെർട്സ്’ മാത്രമായിരിക്കുമെന്ന് ഉദ്യോഗസ്ഥർ അറിയിച്ചു. ഇതിൽ പുറത്തുനിന്നുള്ള ഒരു രാജ്യത്തിനും ഇടപെടാൻ അവകാശമില്ലെന്നും അവർ ഊന്നിപ്പറഞ്ഞു. ട്രംപിൻ്റെ പ്രസ്താവനകളെ തികഞ്ഞ ആത്മവിശ്വാസത്തോടെയാണ് ഇറാൻ നേരിടുന്നത്. നിലവിലെ സാഹചര്യത്തിൽ അമേരിക്കയുമായി പുതിയ ചർച്ചകൾക്കോ നയതന്ത്ര മാറ്റങ്ങൾക്കോ താല്പര്യമില്ലെന്ന കർക്കശമായ നിലപാടിലാണ് ഇറാൻ ഭരണകൂടം.
ഇറാൻ-ഇസ്രായേൽ-അമേരിക്ക സംഘർഷം ഇന്ന് (2026 മാർച്ച് 7) എട്ടാം ദിവസത്തിലേക്ക് കടന്നിരിക്കുകയാണ്. ശനിയാഴ്ച പുലർച്ചെ മുതൽ ഇറാൻ തലസ്ഥാനമായ ടെഹ്റാനിൽ ഇസ്രായേലും അമേരിക്കയും അതിശക്തമായ ബോംബാക്രമണം തുടരുകയാണ്. ഇറാന്റെ മിസൈൽ വിക്ഷേപണ കേന്ദ്രങ്ങളും ആയുധപ്പുരകളും ലക്ഷ്യമിട്ടാണ് പ്രധാനമായും ആക്രമണം നടക്കുന്നത്. എട്ടു ദിവസം നീണ്ട പോരാട്ടത്തിൽ ഇറാനിൽ മാത്രം 1,300-ലധികം പേർ കൊല്ലപ്പെട്ടതായാണ് റിപ്പോർട്ടുകൾ.
ലബനനിലും ഇസ്രായേലിലും മരണങ്ങൾ റിപ്പോർട്ട് ചെയ്തിട്ടുണ്ട്. ഇറാൻ തിരിച്ചടിയായി ബഹ്റൈൻ, സൗദി അറേബ്യ, ഖത്തർ തുടങ്ങിയ രാജ്യങ്ങളിലെ അമേരിക്കൻ കേന്ദ്രങ്ങളിലേക്ക് ഡ്രോൺ, മിസൈൽ ആക്രമണങ്ങൾ നടത്തി. ഗൾഫ് രാജ്യങ്ങളിലെ വിമാനത്താവളങ്ങളുടെ പ്രവർത്തനത്തെയും ഇത് ബാധിച്ചിട്ടുണ്ട്.
