ശനിയാഴ്ച മുതൽ അമേരിക്കയിൽ ആഞ്ഞടിച്ച അതിശക്തമായ ശൈത്യകാല കൊടുങ്കാറ്റ് വലിയ നാശനഷ്ടങ്ങൾക്കും മരണങ്ങൾക്കും കാരണമായിട്ടുണ്ട്. ഇതുവരെ ഒമ്പത് മരണങ്ങൾ റിപ്പോർട്ട് ചെയ്യപ്പെട്ടിട്ടുണ്ട്. ഇതിൽ ന്യൂയോർക്ക് സിറ്റിയിൽ അതിശൈത്യം മൂലം മരിച്ച നിലയിൽ കണ്ടെത്തിയ അഞ്ചുപേരും, ലൂസിയാനയിൽ ഹൈപ്പോതെർമിയ ബാധിച്ച് മരിച്ച രണ്ടുപേരും ഉൾപ്പെടുന്നു. ടെക്സസ് മുതൽ ന്യൂയോർക്ക് വരെയുള്ള ഏകദേശം 22 സംസ്ഥാനങ്ങളിൽ ഭരണകൂടം അടിയന്തരാവസ്ഥ പ്രഖ്യാപിച്ചു. ഏകദേശം 230 ദശലക്ഷം ആളുകളെ ഈ കൊടുങ്കാറ്റ് ബാധിക്കുമെന്ന് മുന്നറിയിപ്പുണ്ട്.കൊടുങ്കാറ്റ് കാരണം അമേരിക്കയിലുടനീളം പത്തുലക്ഷത്തോളം ഉപഭോക്താക്കൾക്ക് വൈദ്യുതി ബന്ധം നഷ്ടമായിട്ടുണ്ട്.
ടെന്നസിയിൽ മാത്രം മൂന്ന് ലക്ഷത്തിലധികം പേർക്ക് വൈദ്യുതിയില്ല. കൂടാതെ, മിസിസിപ്പി, ലൂസിയാന, ടെക്സസ് തുടങ്ങിയ തെക്കൻ സംസ്ഥാനങ്ങളെയാണ് ഇത് ഏറ്റവും കൂടുതൽ ബാധിച്ചത്. കൊടുങ്കാറ്റിനു പിന്നാലെ അതിശൈത്യം തുടരാൻ സാധ്യതയുള്ളതിനാൽ വൈദ്യുതി ബന്ധം പുനഃസ്ഥാപിക്കുന്നത് വരെ ജനങ്ങൾ ജാഗ്രത പാലിക്കണമെന്ന് കാലാവസ്ഥാ നിരീക്ഷണ കേന്ദ്രം മുന്നറിയിപ്പ് നൽകുന്നു.മോശം കാലാവസ്ഥയെത്തുടർന്ന് അമേരിക്കയിൽ ഞായറാഴ്ച മാത്രം 11,000-ത്തിലധികം വിമാന സർവീസുകൾ റദ്ദാക്കിയിട്ടുണ്ട്.
കോവിഡ്-19 മഹാമാരിക്ക് ശേഷമുള്ള ഏറ്റവും വലിയ വിമാന സർവീസ് തടസ്സമായി ഇത് കണക്കാക്കപ്പെടുന്നു. വാഷിംഗ്ടൺ റൊണാൾഡ് റീഗൻ നാഷണൽ എയർപോർട്ട് (DCA), ഫിലാഡൽഫിയ ഇന്റർനാഷണൽ എയർപോർട്ട് എന്നിവിടങ്ങളിൽ ഞായറാഴ്ചത്തെ ഭൂരിഭാഗം സർവീസുകളും റദ്ദാക്കി. ന്യൂയോർക്കിലെ ലാഗ്വാർഡിയ എയർപോർട്ട് ഞായറാഴ്ച ഉച്ചയോടെ അടച്ചു. കനത്ത മഞ്ഞുവീഴ്ചയെത്തുടർന്ന് എയർ ഇന്ത്യ 25, 26 തീയതികളിൽ ന്യൂയോർക്ക്, നെവാർക്ക് എന്നിവിടങ്ങളിലേക്കും തിരിച്ചുമുള്ള എല്ലാ സർവീസുകളും റദ്ദാക്കി.
പലയിടങ്ങളിലും റോഡുകൾ മഞ്ഞുവീണ് അപകടകരമായ അവസ്ഥയിലായതിനാൽ യാത്രകൾ ഒഴിവാക്കാൻ അധികൃതർ നിർദ്ദേശിച്ചു. അർക്കൻസാസിൽ ഇതുവരെ 8 ഇഞ്ച്, ഇല്ലിനോയിസ്, ഒഹായോ എന്നിവിടങ്ങളിൽ 11 ഇഞ്ച്, ഇന്ത്യാനയിൽ 13 ഇഞ്ച്, കൻസസിൽ 8, മിസോറിയിൽ 12, ഒക്ലഹോമയിൽ 7, ടെക്സസിൽ 6, ടെന്നസിയിൽ 5 ഇഞ്ച് എന്നിങ്ങനെ മഞ്ഞുവീഴ്ചയുണ്ടായി. വടക്കുകിഴക്കൻ മേഖലയിൽ, ഇതുവരെ ന്യൂജേഴ്സിയിൽ 12 ഇഞ്ച്, ന്യൂയോർക്കിൽ 11 ഇഞ്ച്, പെൻസിൽവാനിയയിൽ 15 ഇഞ്ച് എന്നിങ്ങനെയും മഞ്ഞുവീഴ്ചയുണ്ടായതായി റിപ്പോർട്ടുണ്ട്. ഡാളസ്, ഒക്ലഹോമ സിറ്റി, ഒക്ലഹോമ; സെന്റ് ലൂയിസ്, മിസോറി; ലൂയിസ്വില്ലെ, കെന്റക്കി; ക്ലീവ്ലാൻഡ്, ഒഹായോ; വാഷിംഗ്ടൺ ഡി.സി.; ഫിലാഡൽഫിയ; ബോസ്റ്റൺ തുടങ്ങിയ നഗരങ്ങളിൽ ശൈത്യകാല കൊടുങ്കാറ്റ് മുന്നറിയിപ്പുകൾ പുറപ്പെടുവിച്ചു.ഞായറാഴ്ച വൈകുന്നേരത്തോടെ, കനത്ത മഞ്ഞ് ന്യൂ ഇംഗ്ലണ്ടിൽ എത്തും. തിങ്കളാഴ്ച രാവിലെ വരെ വടക്കുകിഴക്കൻ മേഖലയിൽ നേരിയ മഞ്ഞ് വീഴാൻ സാധ്യതയുണ്ട്.
