ബിബിസിക്കെതിരായ മാനനഷ്ടക്കേസിൽ അമേരിക്കൻ പ്രസിഡന്റ് ഡോണൾഡ് ട്രംപ് ഡിസംബർ 11നകം മൊഴി നൽകണമെന്ന് യുഎസ് കോടതി ഉത്തരവിട്ടു. കേസിന്റെ ഭാഗമായി അഭിഭാഷകരുടെ ചോദ്യങ്ങൾക്ക് സത്യവാങ്മൂലത്തിന്റെ അടിസ്ഥാനത്തിൽ മറുപടി നൽകണമെന്നാണ് നിർദേശം. 2021 ജനുവരി ആറിന് യുഎസ് ക്യാപിറ്റോളിൽ കലാപമുണ്ടാകുന്നതിന് മുൻപ് ട്രംപ് നടത്തിയ പ്രസംഗത്തിന്റെ രണ്ട് വ്യത്യസ്ത ഭാഗങ്ങൾ കൂട്ടിച്ചേർത്ത് സംപ്രേഷണം ചെയ്തെന്നാരോപിച്ചാണ് ബിബിസിക്കെതിരെ ട്രംപ് കേസ് നൽകിയത്.
ബിബിസിയുടെ ‘പനോരമ’ പരിപാടിയിൽ പ്രസംഗം എഡിറ്റ് ചെയ്ത രീതിയാണ് കേസിന് ആധാരം.കേസിന്റെ വിചാരണയ്ക്ക് മുന്നോടിയായുള്ള തെളിവുശേഖരണ കാലയളവ് അവസാനിക്കാൻ രണ്ടുമാസം മാത്രം ശേഷിക്കെ ട്രംപിന്റെ മൊഴി ഇതുവരെ രേഖപ്പെടുത്താനായിട്ടില്ലെന്ന് ബിബിസിക്കുവേണ്ടി ഹാജരായ അഭിഭാഷകൻ ചാൾസ് ടോബിൻ കോടതിയെ അറിയിച്ചു. ഒക്ടോബർ 16ന് നിശ്ചയിച്ചിരുന്ന മൊഴിയെടുപ്പിൽനിന്ന് ട്രംപ് പിന്മാറിയിരുന്നു. ജോർജിയയിൽ പ്രചാരണത്തിലായിരുന്ന അദ്ദേഹം, ദേശീയ പ്രാധാന്യമുള്ള കാര്യങ്ങൾ ചൂണ്ടിക്കാട്ടിയാണ് അന്ന് ഹാജരാകാതിരുന്നത്.
കേസിലെ യുഎസ് മജിസ്‌ട്രേറ്റ് ജഡ്ജി എൻജോളിക് ലെറ്റ്, തെളിവുശേഖരണ കാലാവധി നീട്ടുന്നില്ലെങ്കിൽ ഡിസംബർ 11നകം ട്രംപ് മൊഴി നൽകണമെന്ന് ഉത്തരവിട്ടു. നേരത്തേ നിശ്ചയിച്ച കൂടിക്കാഴ്ച നടക്കാതിരുന്നതിനെത്തുടർന്ന് ട്രംപിനെ മൊഴി നൽകാൻ നിർബന്ധിക്കണമെന്ന് ബിബിസിയുടെ അഭിഭാഷകർ കഴിഞ്ഞയാഴ്ച കോടതിയോട് ആവശ്യപ്പെട്ടിരുന്നു. അന്ന് ട്രംപ് ജോർജിയയിലെ ഡാൾട്ടണിൽ നടന്ന ഇടക്കാല തിരഞ്ഞെടുപ്പ് പ്രചാരണ റാലിയിലും ഫ്ലോറിഡയിലെ മാർ-എ-ലാഗോയിലെ സ്വന്തം വസതിയിൽ നടന്ന ധനസമാഹരണ പരിപാടിയിലും പങ്കെടുത്തിരുന്നു.
അതേസമയം, അടുത്ത വർഷം ജനുവരി 11നും 22നും ഇടയിൽ ട്രംപിന് മൊഴി നൽകാനാകുമെന്ന് അദ്ദേഹത്തിന്റെ അഭിഭാഷകർ ബുധനാഴ്ച സമർപ്പിച്ച രേഖയിൽ അറിയിച്ചു. ട്രംപ് മൊഴി നൽകുന്നത് ഒഴിവാക്കുകയാണെന്ന ബിബിസിയുടെ വാദം തെറ്റാണെന്നും അവർ വ്യക്തമാക്കി. 2021 ജനുവരി ആറിന് ക്യാപിറ്റോളിന് പുറത്ത് ട്രംപ് നടത്തിയ പ്രസംഗം ബിബിസി മനഃപൂർവവും ദുരുദ്ദേശ്യത്തോടെയും തെറ്റിദ്ധരിപ്പിക്കുന്ന രീതിയിൽ എഡിറ്റ് ചെയ്തെന്നാണ് ഫ്ലോറിഡയിൽ നൽകിയ കേസിലെ ആരോപണം. അക്രമത്തിന് നേരിട്ട് ആഹ്വാനം ചെയ്തെന്ന തെറ്റായ ധാരണ പരിപാടി സൃഷ്ടിച്ചുവെന്ന് സമ്മതിച്ച ബിബിസി സംഭവത്തിൽ ഖേദം പ്രകടിപ്പിച്ചിരുന്നു.
എന്നാൽ, പരിപാടി മാനനഷ്ടക്കേസിന് ആവശ്യമായ നിയമപരമായ മാനദണ്ഡങ്ങൾ പാലിക്കുന്നില്ലെന്നും അമേരിക്കയിൽ സംപ്രേഷണം ചെയ്തിട്ടില്ലെന്നും ചൂണ്ടിക്കാട്ടി കേസ് തള്ളണമെന്ന് ബിബിസി കോടതിയോട് ആവശ്യപ്പെട്ടു. ബിബിസിയുടെ സബ്‌സ്‌ക്രിപ്ഷൻ സേവനമായ ബ്രിട്ട്ബോക്‌സിലൂടെയോ വെബ്‌സൈറ്റിലൂടെയോ ബിബിസി സെലക്ടിലൂടെയോ യുഎസ് ടെലിവിഷൻ ശൃംഖലകളിലൂടെയോ ഡോക്യുമെന്ററി അമേരിക്കയിൽ ലഭ്യമായിരുന്നുവെന്നതിന് തെളിവില്ലെന്ന് ട്രംപിന്റെ അഭിഭാഷകർ ജൂലൈയിൽ സമ്മതിച്ചിരുന്നു. നേരത്തേ ഇവിടങ്ങളിലൂടെ പരിപാടി ലഭ്യമായിരുന്നുവെന്നായിരുന്നു അവരുടെ വാദം.
ഡോക്യുമെന്ററി നിർമിക്കുന്നതിലോ അതിന്റെ ഉള്ളടക്കം തയ്യാറാക്കുന്നതിലോ പങ്കില്ലെന്ന് ബിബിസി വാദിച്ചതിനെത്തുടർന്ന്, സ്ഥാപനത്തിന്റെ വാണിജ്യ വിഭാഗമായ ബിബിസി സ്റ്റുഡിയോസിനെതിരായ കേസ് പിൻവലിക്കാനും ട്രംപ് സമ്മതിച്ചിരുന്നു. സാധാരണയായി കോടതിമുറിക്ക് പകരം അഭിഭാഷകന്റെ ഓഫീസിലാണ് ഇത്തരം മൊഴിയെടുപ്പുകൾ നടക്കുന്നത്. ജഡ്ജിയുടെ നേരിട്ടുള്ള സാന്നിധ്യം ഇതിന് ആവശ്യമില്ല. എന്നാൽ, സത്യപ്രതിജ്ഞയുടെ അടിസ്ഥാനത്തിൽ രേഖപ്പെടുത്തുന്ന മൊഴികൾക്ക് നിയമപരമായ പ്രാധാന്യമുണ്ട്. കോടതി റിപ്പോർട്ടർ വാക്കുകൾ അതേപടി രേഖപ്പെടുത്തുകയും ഈ മൊഴികൾ പിന്നീട് വിചാരണയിൽ തെളിവായി ഉപയോഗിക്കുകയും ചെയ്യാം.
