വാഷിംഗ്ടൺ : അമേരിക്കയിൽ നിയമവിരുദ്ധ കുടിയേറ്റക്കാർക്കെതിരെയുള്ള നടപടികൾ ട്രംപ് ഭരണകൂടം ശക്തമാക്കുന്നു. യുഎസ് ഇമിഗ്രേഷൻ ആൻഡ് കസ്റ്റംസ് എൻഫോഴ്സ്മെൻ്റ് (ഐസിഇ) കഴിഞ്ഞ മാസം അവസാനം വെറും അഞ്ച് ദിവസത്തിനുള്ളിൽ പതിനായിരത്തോളം പേരെയാണ് അറസ്റ്റ് ചെയ്തത്. പ്രമുഖ വാർത്താ ഏജൻസിയായ അസോസിയേറ്റഡ് പ്രസ്സാണ് ഈ വിവരങ്ങൾ പുറത്തുവിട്ടത്.
വെള്ളിയാഴ്ച മുതൽ ചൊവ്വാഴ്ച വരെയുള്ള അഞ്ച് ദിവസങ്ങളിലായി പ്രതിദിനം ശരാശരി 2,000 അറസ്റ്റുകളാണ് രേഖപ്പെടുത്തിയത്. ട്രംപ് ഭരണകൂടത്തിൻ്റെ മുൻ മാസങ്ങളിലെ അറസ്റ്റ് നിരക്കുകളേക്കാൾ വളരെ ഉയർന്നതാണിത്. മുൻപ് ഡിസംബറിൽ രേഖപ്പെടുത്തിയ 1,283 ആയിരുന്നു ഇതിനുമുൻപുള്ള ഏറ്റവും ഉയർന്ന പ്രതിദിന ശരാശരി.
വൻ നഗരങ്ങളിൽ വലിയ തോതിൽ മാധ്യമശ്രദ്ധ നേടുന്ന തരത്തിലുള്ള പരസ്യ റെയ്ഡുകൾ നടത്തുന്ന ശൈലിയിൽ നിന്നും അധികൃതർ ഇപ്പോൾ മാറ്റം വരുത്തിയിട്ടുണ്ട്. മിനിയാപൊളിസിൽ നടന്ന ഇമിഗ്രേഷൻ റെയ്ഡുകൾക്കെതിരെയുള്ള പ്രതിഷേധത്തിനിടെ രണ്ട് അമേരിക്കൻ പൗരന്മാർ കൊല്ലപ്പെട്ടതിനെത്തുടർന്നാണ് അധികൃതർ തന്ത്രം മാറ്റിയത്. മുൻപ് ക്രിസ്റ്റി നോം, ഗ്രിഗറി ബോവിനോ എന്നിവരുടെ നേതൃത്വത്തിൽ നടന്ന പരസ്യമായ സേനാ വിന്യാസങ്ങൾ വലിയ പ്രതിഷേധങ്ങൾക്ക് കാരണമായിരുന്നു.
എന്നാൽ നിലവിലെ ഹോംലാൻഡ് സെക്യൂരിറ്റി സെക്രട്ടറി മാർക്ക്വെയ്ൻ മുള്ളിൻ്റെ നേതൃത്വത്തിൽ, വലിയ ബഹളങ്ങളില്ലാതെ നിശബ്ദമായി ലക്ഷ്യമിട്ടവരെ കണ്ടെത്തുന്ന രഹസ്യ ഓപ്പറേഷനുകളാണ് ഇപ്പോൾ നടക്കുന്നത്. പരസ്യമായ റെയ്ഡുകൾ കുറഞ്ഞെങ്കിലും അറസ്റ്റുകളുടെ എണ്ണത്തിൽ വൻ വർദ്ധനവാണ് ഉണ്ടായിരിക്കുന്നത്.
അതേസമയം, അറസ്റ്റുകൾ വ്യാപകമായതോടെ ഐ.സി.ഇ തടങ്കൽ കേന്ദ്രങ്ങളിലെ അന്തേവാസികളുടെ എണ്ണവും കുത്തനെ ഉയർന്നു. ഫെബ്രുവരി മുതൽ പ്രതിമാസം ശരാശരി 30,000 എന്ന നിലയിലായിരുന്ന തടങ്കലിലുള്ളവരുടെ എണ്ണം ജൂൺ മാസത്തോടെ 39,000 ആയി ഉയർന്നു.നടപടികളെ ന്യായീകരിച്ച് ഡിപ്പാർട്ട്മെൻ്റ് ഓഫ് ഹോംലാൻഡ് സെക്യൂരിറ്റി പ്രസ്താവന ഇറക്കി. കൊലപാതകികൾ, ബലാത്സംഗക്കേസ് പ്രതികൾ, പീഡകർ, ഭീകരർ, ഗാങ് അംഗങ്ങൾ എന്നിവരുൾപ്പെടെയുള്ള കുറ്റവാളികളായ അനധികൃത കുടിയേറ്റക്കാരെ നാടുകടത്തുമെന്ന പ്രസിഡൻ്റ് ട്രംപിൻ്റെ വാഗ്ദാനം പാലിക്കുക മാത്രമാണ് തങ്ങൾ ചെയ്യുന്നതെന്ന് ഡി.എച്ച്.എസ് വ്യക്തമാക്കി. “നിയമവിരുദ്ധമായി രാജ്യത്തേക്ക് കടക്കുന്നവരെ കണ്ടെത്തുക തന്നെ ചെയ്യും” എന്ന ശക്തമായ മുന്നറിയിപ്പും അധികൃതർ നൽകുന്നു. വരും മാസങ്ങളിലും നാടുകടത്തൽ നടപടികൾ കൂടുതൽ ശക്തമായി തുടരുമെന്നാണ് പുറത്തുവരുന്ന കണക്കുകൾ സൂചിപ്പിക്കുന്നത്.
