ഇന്ത്യയിലെ സ്വർണ്ണ ആവശ്യകതയില് കഴിഞ്ഞ രണ്ടാഴ്ചയ്ക്കുള്ളില് 70 ശതമാനത്തിന്റെ വൻ ഇടിവ് രേഖപ്പെടുത്തിയതായി റിപ്പോർട്ടുകള് പുറത്തുവരുന്നു. കേന്ദ്ര സർക്കാർ ഈ മാസം ആദ്യം സ്വർണ്ണത്തിന്റെ ഇറക്കുമതി തീരുവ ഇരട്ടിയിലധികം വർദ്ധിപ്പിച്ചതിന് പിന്നാലെയാണ് വിപണിയെ ഞെട്ടിച്ച ഈ തകർച്ചയുണ്ടായത്. ഇതിനൊപ്പം പശ്ചിമേഷ്യയില് യുദ്ധ സാഹചര്യം തുടരുന്നത് രാജ്യത്ത് ഇന്ധന-ഭക്ഷണ വിലക്കയറ്റം രൂക്ഷമായതും ഉപഭോക്താക്കളുടെ കീശയെ കാലിയാക്കി. സാധാരണക്കാരുടെ ബജറ്റ് തെറ്റിയതോടെ സ്വർണ്ണം വാങ്ങുന്നത് ജനങ്ങളുടെ മുൻഗണനാ പട്ടികയില് നിന്ന് പൂർണ്ണമായും പുറത്തായിരിക്കുകയാണ്.
ഇന്ത്യ ബുളളിയൻ ആൻഡ് ജ്വല്ലേഴ്സ് അസോസിയേഷന്റെ ഏറ്റവും പുതിയ കണക്കുകള് പ്രകാരം, മേയ് മാസത്തെ അവസാന രണ്ടാഴ്ചയ്ക്കുള്ളില് രാജ്യത്തെ സ്വർണ്ണ ആവശ്യകത വെറും 7.5 ടണ്ണിലേക്ക് ചുരുങ്ങി. കഴിഞ്ഞ വർഷം ഇതേ കാലയളവില് രാജ്യത്തെ മൊത്തം സ്വർണ്ണ വിപണിയിലെ ആവശ്യകത 25 ടണ്ണായിരുന്നു എന്നതുമായി താരതമ്യം ചെയ്യുമ്പോഴാണ് നിലവിലെ തകർച്ചയുടെ ആഴം വ്യക്തമാകുന്നത്.
വിപണിയെ തകർത്ത പ്രധാന കാരണങ്ങള് ഇറക്കുമതി തീരുവ ഇരട്ടിയാക്കി : മേയ് 13 മുതല് പ്രാബല്യത്തില് വരുംവിധം സ്വർണ്ണത്തിന്റെ ഇറക്കുമതി തീരുവ 6 ശതമാനത്തില് നിന്ന് 15 ശതമാനമായാണ് സർക്കാർ ഉയർത്തിയത്. 3% ജി.എസ്.ടി കൂടി ചേരുന്നതോടെ ആകെ നികുതി ഭാരം 9.18 ശതമാനത്തില് നിന്ന് 18.45 ശതമാനമായി ഇരട്ടിച്ചു. ഇത് വിപണിയില് വലിയ വിലക്കയറ്റത്തിന് കാരണമായി.
ഇറാൻ യുദ്ധവും പണപ്പെരുപ്പവും: പശ്ചിമേഷ്യയിലെ ഇറാൻ യുദ്ധം കാരണം അന്താരാഷ്ട്ര വിപണിയില് ക്രൂഡ് ഓയില് വില കുതിച്ചുയരുകയും ഇന്ത്യയില് പെട്രോള്, ഡീസല് വിലയും നിത്യോപയോഗ സാധനങ്ങളുടെ വിലയും കുത്തനെ കൂടുകയും ചെയ്തു. സാധാരണക്കാരുടെ ബജറ്റ് തെറ്റിയതോടെ സ്വർണ്ണം വാങ്ങുന്നത് ജനങ്ങളുടെ മുൻഗണനാ പട്ടികയില് നിന്ന് പുറത്തായി.
മോദിയുടെ ആഹ്വാനം : രാജ്യം നേരിടുന്ന വിദേശ നാണ്യ പ്രതിസന്ധി മറികടക്കാൻ ഒരു വർഷത്തേക്ക് സ്വർണ്ണം വാങ്ങുന്നത് ഒഴിവാക്കണമെന്ന് പ്രധാനമന്ത്രി നരേന്ദ്ര മോദി ജനങ്ങളോട് അഭ്യർത്ഥിച്ചതും ഉപഭോക്തൃ വികാരത്തെ ശക്തമായി ബാധിച്ചു. പ്രമുഖ ജ്വല്ലറി ശൃംഖലയായ ജോയ് ആലുക്കാസില് മാത്രം ബിസിനസ്സില് 35 ശതമാനത്തിലധികം ഇടിവ് രേഖപ്പെടുത്തിയിട്ടുണ്ട്.
ചെറുകിട വ്യാപാരികള് പ്രതിസന്ധിയില് : ഇന്ത്യയിലെ മൊത്തം സ്വർണ്ണ വ്യാപാരത്തിന്റെ 65 ശതമാനവും കൈകാര്യം ചെയ്യുന്ന അസംഘടിത വിപണിയെയാണ് ഈ നികുതി വർദ്ധനവും ഡിമാൻഡ് ഇടിവും ഏറ്റവും മാരകമായി ബാധിച്ചത്. പെട്ടെന്നുണ്ടായ ഈ തിരിച്ചടി മൂലം പല പ്രമുഖ ജ്വല്ലറികളും പുതിയ സ്വർണ്ണം ഹോള്സെയിലായി സംഭരിക്കുന്നത് താല്ക്കാലികമായി നിർത്തി വെച്ചിരിക്കുകയാണ്.
നിലവിലെ കടുത്ത വിലക്കയറ്റം കാരണം ഉപഭോക്താക്കള് വലിയ ആഭരണങ്ങള് വാങ്ങുന്നതിന് പകരം ഭാരം കുറഞ്ഞതും കാരറ്റ് കുറഞ്ഞതുമായ ആഭരണങ്ങളിലേക്ക് മാറുകയാണെന്ന് വ്യാപാരികള് പറയുന്നു. ഇതിനൊപ്പം പുതിയ പണം മുടക്കി സ്വർണ്ണം വാങ്ങുന്നതിന് പകരം, കൈവശമുള്ള പഴയ സ്വർണ്ണം വിറ്റ് പണമാക്കാനും മറ്റ് ആവശ്യങ്ങള് നടത്താനുമുള്ള വൻ തിരക്കാണ് ഇപ്പോള് വിപണിയില് ദൃശ്യമാകുന്നത്. വരുന്ന വിവാഹ സീസണിലും ഈ പ്രതിസന്ധി തുടർന്നാല് വിപണി കൂടുതല് തകർച്ചയിലേക്ക് നീങ്ങുമെന്നാണ് സാമ്പത്തിക വിദഗ്ധരുടെ മുന്നറിയിപ്പ്.
