ന്യൂഡല്ഹി : രാജ്യവ്യാപകമായി പ്രതിഷേധങ്ങള്ക്ക് കാരണമായ വഖഫ് (ഭേദഗതി) നിയമത്തിലെ ചില നിര്ണായക വ്യവസ്ഥകള് സ്റ്റേ ചെയ്ത് സുപ്രീം കോടതി. അവയില് ചിലത് ‘ഏകപക്ഷീയമായ’ അധികാര വിനിയോഗമാണെന്ന് ചൂണ്ടിക്കാട്ടിയാണ് സുപ്രീം കോടതിയുടെ നിര്ണായക നീക്കം. അന്തിമ ഉത്തരവ് വരുന്നതുവരെയാണ് ഭാഗിക സ്റ്റേ. ‘ചില വിഭാഗങ്ങള്ക്ക് ചില സംരക്ഷണം ആവശ്യമാണെന്നും’ ചീഫ് ജസ്റ്റിസ് ബി ആര് ഗവായിയും ജസ്റ്റിസ് എ ജി മാസിഹും അടങ്ങുന്ന ബെഞ്ച് പറഞ്ഞു.
വഖ്ഫ് സ്വത്തുക്കളില് സര്ക്കാരുകള്ക്ക് ഇടപെടാന് അവസരം നല്കുന്ന വിധത്തില് കേന്ദ്രസര്ക്കാര് കൊണ്ടുവന്ന വിവാദമായ വഖ്ഫ് നിയമ ഭേദഗതിക്കാണ് സുപ്രിംകോടതിയിൽ നിന്നും തിരിച്ചടി നേരിട്ടത്. പൂര്ണമായും സ്റ്റേ ചെയ്യാതിരുന്ന കോടതി, അപൂര്വ സമയങ്ങളില് മാത്രമെ സമ്പൂര്ണമായി സ്റ്റേ ഉണ്ടാകൂവെന്ന് പറഞ്ഞു.
ജില്ലാ കലക്ടറുടെ അധികാരം സുപ്രീംകോടതി സ്റ്റേ ചെയ്തു. അന്തിമ ഉത്തരവ് വരുന്ന വരെ വഖഫ് സ്വത്തുകളുടെ സ്വഭാവം മാറ്റരുതെന്നും കോടതി വ്യക്തമാക്കി. വഖഫ് ബോർഡ് ചീഫ് എക്സിക്യൂട്ടീവിൽ കഴിവതും മുസ്ലിം ആയിരിക്കണം. എന്നാൽ മുസ്ലിം ഇതര വിശ്വാസിയെയും വഖഫ് ബോര്ഡ് സിഇഒ ആക്കാം. നിയമത്തിലെ ചട്ടങ്ങൾ രൂപീകരിക്കുന്നത് വരെയാണ് സ്റ്റേ എന്നും കോടതി അറിയിച്ചു. വകുപ്പ് സ്റ്റേ ചെയ്യാന് സുപ്രീംകോടതി വിസമ്മതിച്ചു. രാജ്യവ്യാപകമായി വഖഫ് സ്വത്തുക്കൾ കൈയേറുകയും ഇടിച്ചുനിരത്തുകയും ചെയ്യുമ്പോഴാണ് സുപ്രീംകോടതി വിധി.
വഖഫ് ബോര്ഡുകളില് ഇതരമതസ്ഥരുടെ നിയമനം തെറ്റാണെന്ന് ഹരജിക്കാർ ചൂണ്ടിക്കാട്ടിയിരുന്നു. അഞ്ച് വര്ഷം ഇസ്ലാം മതം അനുഷ്ഠിക്കണമെന്ന വ്യവസ്ഥ ഒഴിവാക്കണം. ദീര്ഘകാല ഉപയോഗം കൊണ്ട് വഖഫ് ആയ സ്വത്തുക്കള്ക്ക് സാധുതയുണ്ട്. എല്ലാ സ്വത്തുക്കള്ക്കും രേഖകള് നിര്ബന്ധമാക്കാനാകില്ല. അന്വേഷണം തുടങ്ങിയാലുടന് വഖഫ് സ്വത്ത് അതല്ലാതാകുമെന്ന വ്യവസ്ഥ അംഗീകരിക്കാനാവില്ല എന്നിവയും ഹരിജിക്കാർ മുന്നോട്ടുവെച്ചിരുന്നു
കഴിഞ്ഞ മേയ് 22നാണ് നിയമത്തിന്റെ ഭരണഘടന സാധ്യത ചോദ്യം ചെയ്തുള്ള ഹരജികളില് സുപ്രിംകോടതി വിധി പറയാന് മാറ്റിയത്. നിയമം ഭരണഘടന ലംഘനമെന്നായിരുന്നു ഹരജിക്കാരുടെ വാദം. നിയമത്തില് ഭരണഘടനാ വിരുദ്ധതയില്ലെന്നാണ് കേന്ദ്രസര്ക്കാര് വാദിച്ചത്.
എന്നാല് വഖഫ് ഇസ്ലാമിലെ ആനിവാര്യമായ മതാചാരമല്ല. സ്വത്തുമായി ബന്ധപ്പെട്ട വിഷയങ്ങളില് മതാടിസ്ഥാനത്തില് അല്ല തീരുമാനം. വഖഫില് പുറമ്പോക്കുണ്ടോയെന്ന് പരിശോധിക്കാന് സര്ക്കാരിന് അധികാരമുണ്ട്. നിയമപ്രകാരമുള്ള നടപടികളില് എതിര്പ്പുണ്ടെങ്കില് കോടതിയെ സമീപിക്കാം. ഏകപക്ഷീയമായി നിയമം പാസാക്കിയെന്ന് ഹര്ജിക്കാരുടെ വാദം തെറ്റാണെന്നുാണ് കേന്ദ്രസര്ക്കാര് പറഞ്ഞത്.പുതിയ ബില്ലിന് സ്റ്റേയില്ലാത്തതിനാല് രാജ്യവ്യാപകമായി വഖഫ് സ്വത്തുക്കള് കൈയേറുകയും ഇടിച്ചുനിരത്തുകയും ചെയ്യുന്ന സാഹചര്യത്തിലായിരുന്നു സുപ്രിംകോടതി വിധി പറഞ്ഞത്.
